Apirilaren 26an Osakidetzako sare osoan Oraintsuko Suizidio Ahaleginaren Kode Berria (CISR) ezarri zenetik, eta ezagutzera eman diren lehen datuen arabera, lehenengo lau hilabeteetan, arrisku egoeran dauden 300 pertsona baino gehiago detektatu eta artatu dira.
CISR kodearen ezarpena Euskadiko Suizidioa Prebenitzeko Estrategian jasotako neurrietako bat da. Estrategia hori 2019an jarri zen abian, munduan den osasun publikoko arazo nagusietako bat den suizidioaren fenomenoak duen eragina, prebalentzia eta eragina murrizteko.
Zenbait kalkuluen arabera, pertsona batek 40 segundotik behin kentzen du bizia planeta osoan; Espainian, batez bestekoa egunean 10 suizidiokoa da, eta Euskadin, berriz, bi egunetik behin autoeragindako heriotza bat erregistratzen da.
CISR ezartzeaz gain, beste aurrerapen batzuk egin dira suizidioari aurrea hartzeko. Esate baterako, Osakidetzak 024 telefonotik (Jokabide suizidari arreta emateko telefonoa) bideratutako pertsonei laguntza eskaintzen die, eta Lehen Mailako Arretako Pediatriak baheketa bat ezarri du nerabeen depresioaren prebentziorako.
Hezkuntza arloan ere urrats garrantzitsuak eman dira. Horrela, Hezkuntza eta Osasun Sailek protokolo bat egin dute ikastetxeetan arrisku-kasuak detektatzeko.
Aurreikusiriko beste jarduketa ildo bat prestakuntza ikastaro presentzialak eta online ikastaroak dira, osasun arloko nahiz osasun arlokoak ez diren langileei, herritarrei eta egoera ahulean dauden taldeei zuzenduak.
