Donostiako 89 gaztek eta haien familiek parte hartu zuten iaz isunak kentzeko ‘Eztenkadak’ programan. 2007. urtez geroztik martxan den programa horren baitan, substantziak kontsumitzeagatik edo edukitzeagatik ezarritako zigorren ordez esku-hartze psikohezitzaile bat ezartzen da.
Orain Elkarteak garatzen du programa eta pasa den urtean, pandemiaren ondorioz, programaren garapena mugatua izan zela azaldu dute. Osasun-egoeraren ondorioz ezarritako murrizketak direla eta, hainbat kasutan, jarduerak online burutu behar izan dira.
Datuak
Adin-tarteen arabera, 18 urtekoak (40 parte-hartzaile), 17 urtekoak (26 parte-hartzaile) eta 16 urtekoak (29 parte-hartzaile) dira nabarmenenak. 2020an ez zen nerabe goiztiarrik erregistratu (13 urtetik beherakoak), eta parte-hartzaile bakarrak 14 urte zituen. Parte-hartzaileen % 72 mutilak izan dira, eta gainerako % 28, neskak.
Osasun Publikoko zinegotzi Marisol Garmendiak adierazi duenez, “programa baliotsua da eta, horren bidez, Udalak ez du bilatu nahi horrelako substantzien (alkoholaren edo drogen) jarrera edo edukitzea zigortzea, baizik eta adingabeen berreziketa, eta ulertarazi nahi die substantzia horien kontsumoak mota guztietako arazoak baino ez dakartzala.”
Garmendiak emandako datuen arabera, adingabe gehienek (% 54) kalean kalamua edukitzeagatik edo kontsumitzeagatik jaso zuten isuna: % 46k, berriz, alkoholaren kontsumoagatik.
Oro har, Udaltzaingoak alkohola edo drogak kontsumitzeagatik adingabe bati salaketa bat jartzen dionean, familiari horren berri emateko orduan, programan parte hartzera gonbidatzen zaie. Familiak eskaintza onartzen badu, dagokion sailari jakinaraziko zaio, zehapen-espedientea geldi dezan. Isunik gabeko esku-hartzeak ere badira, familiari abisatuz eta jardueran parte hartzera gonbidatuz. 2017. urtean isunarekin egin ziren esku-hartzeak 54 izan ziren. 2018an kopuru hori 76raino igo zen eta 2019an ia ehunera iritsi zen (95). pasa den urteko irailera arte erregistratutako esku-hartzeak 48 izan ziren.
