Sexuari buruz gutxi hitz egiten dugu
© Shutterstock.com

Sexuaren inguruan dugun pertzepzioa hezkuntza eta erlijioa bezalako faktoreengatik dago baldintzatuta. XX. mendera arte, eta zenbait kasutan oraindik ere, hainbat gizartetan sexua ez da jarduera atsegin eta egoki gisa ikusten, ugaltzeko bide gisa baizik. Zentzu horretan sexuaren desmitifikazioa ez da kontu erraza izan, baina garbi izan behar dugu sexua gure bizitzaren zati garrantzitsu bat dela plazera eta gogobetetasuna ematen baitizkigu.

Hala ere, oraindik ere badira sexua lizunkeriatzat eta bekatuzkotzat hartzen duten pertsonak. Pertsona horiek ez dira gai ulertzeko sexuak gure osasun fisikoari ere mesede egiten diola, horren bidez gure gorputza eta burua egoera ezin hobean mantentzen laguntzen duten erantzun fisiologiko batzuk sortzen direlako.

Sexua beti mugatu izan duten murrizketa moral eta etiko horien guztien ondorioz, gizartearen ehuneko handi bati kosta egiten zaio gai horri buruz hitz egitea. Egia da azken urteetan nolabaiteko liberazio sexual bat izan dela, baina oraindik ere asko dira sexuaren inguruan modu irekian hitz egitera ausartzen ez direnak.

Erreprimituta al gaude?

Zoritxarrez, gaur egun, zuzena litzateke baietz erantzutea. Pertsona batzuk ez dira eroso sentitzen beren sexualitateari buruz hitz egiten, eta hori, esan bezala, batez ere, etxean jasotako hezkuntzaren ondorioa da, baina baita erlijio-sinesmenen ondorioa ere. Adibidez, pertsona bati txikitatik sexua soilik ugalketa-helburuetarako egin behar dela irakatsi bazaio, seguruenik pertsona hori ez da eroso sentituko sexuaren inguruan hitz egiten.

Gaur egun, sexuaren inguruan hitz egitera uko egiten dioten pertsonen kopurua nahikoa altua dela baiezta daiteke. Hori gure biztanleriaren zati handi bat erreprimituta dagoela adierazten duen seinale argia da.

Garrantzitsua al da sexuaren inguruan hitz egitea?

Agian zure bizitzako uneren batean zure buruari planteatu diozun galdera da hori. Eta kasu honetan ere erantzuna baiezkoa da. Edozein ikuspuntutik sexuaren inguruan hitz egitea garrantzitsua da. Azter ditzagun kontu hori ikuspegi ezberdinetatik.

Bikotearen ikuspegitik, sexuaren eta sexualitatearen inguruan hitz egitea ezinbestekoa da harreman osasuntsu bat mantentzeko. Elkarrizketaren bidez, intimitateari buruzko deserosotasun edo zalantzak adieraz daitezke. Era berean, garrantzitsua da nahi dugun eta gustuko dugun horren inguruan hitz egitea. Modu horretan gure bizitza sexuala aberastuko dugu. Gure bikotekidearekin sexuari buruz modu irekian hitz egiteko gai ez bagara, orduan atsekabera eta monotoniara jotzeko arriskua izango dugu.

Familiaren ikuspegitik ere oso garrantzitsua da seme-alabekin sexuaz hitz egitea, batez ere nerabezaroan, adin horretan hasten baitira sentipenak pizten eta sexualitatearekin esperimentatzen. Zentzu horretan, garrantzitsua da aldez aurretik pentsatutako balizko beldurrak eta iritziak ezabatzen saiatzea, gure seme-alabei bizitza sexual arduratsua eta, batez ere, osasungarria izateko aukera emango dien informazio zuzena eman ahal izateko.

Gizarte bezala ere garrantzitsua litzateke sexua gai tabu gisa ikusteari uztea. Sexuaren inguruan diren mitoak eta sinesmenak baztertzen badira bizitza intimo egokia lortzeko gai izango gara, eta, ondorioz, zoriontsuagoak izango gara. Zalantzarik gabe, sexuari buruz hitz egitea garrantzitsua da, bai bikotean bai familian. Hori dela eta, ahalegin bat egin behar da sexuari gure bizitzako parte natural eta funtsezko gisa dagokion lekua emateko. Horrela bakarrik egongo gara bizitza zoriontsu eta betea lortzeko bidean.

SHARE

LEAVE A REPLY

Please enter your comment!
Please enter your name here

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.