Bilboko Udalak ‘Bilbao Gazte Partekatzen’ izeneko programa jarri du abian. Egitasmo horrek emantzipatzeko aukera emango die 22 eta 29 urte bitarteko gazteei Otxarkoagako etxebizitza partekatuetan eta hilean 55 euroren truke. Prezio merke horren truke, parte-hartzaileek astean lan komunitarioko lau ordu egin beharko dituzte. Maizterrak hiru urtez bizi ahal izango dira udal-etxebizitzetan.
Udaleko Gazteria eta Kirola sailak eta Etxebizitza sailak sustatzen duten programa orain beren familiekin bizi diren eta Bilbon erroldatuta dauden gazteei zuzentzen zaie. Hautatuak diren gazteek sukaldea eta oinarrizko altzariak dituzten lau udal-etxebizitza partekatuko dituzte.
Hileko 55 euroko alokairuaren barruan ez dira argiaren, uraren eta gasaren gastuak sartzen. Gastu horiek, gastu komunekin batera, parte-hartzaileek beren kabuz ordaindu beharko dituzte. Kontratuak urtebetekoak izango dira eta gehienez hiru urtera arte luzatu ahal izango dira.
Eskatzaileek bete beharko dituzten baldintzak dira: 22 eta 29 urte bitartekoak izatea, bere kargura pertsonarik ez izatea eta Etxebiden altan egotea alokairuko etxebizitza eskatzaile gisa. Era berean Bilbon erroldatuta egon beharko dute, gutxienez, azken sei hilabeteetan jarraian eta ezin izango dute beren izenean inolako etxebizitzarik izan. Diru-sarrerei dagokienez, 16.520 eta 21.000 euro bitarteko sarrera gordinak izan beharko dituzte urtean. Eskaerak aurkezteko epea abenduaren 9ra arte egongo da zabalik udal webgunearen bidez.
