Nafarroako Gobernuak boluntariotza aldaketa sozialaren eragile gisa arautuko duen foru lege berri bat bultzatuko du. Egun indarrean den Boluntariotzaren Foru Legea 1998. urtekoa da eta, bertan, boluntariotza-ekintza gisa zedarritzen dira “pertsonen portaera soziala dutenak, askatasunez eta modu altruistan, irabazi-asmorik gabeko erakundeetan antolatzen direnak, pertsonei edo komunitateari zerbitzuak emateko, gizakien arteko elkartasuna lortzeko helburuarekin”.
Nafarroako Boluntariotzaren II. Azterlanak jasotako datuen arabera, Nafarroako biztanleen % 44k adierazi du boluntariotzako erakunde eta/edo programetan parte hartu izan duela noizbait bere bizitza osoan, eta gizarte-eremua da parte hartu duten jardueren artean nabarmenena. Emakumeen kasuan, gizarte-boluntariotzari hezkuntza- eta komunitate-esparruetan duten lankidetza gehitu behar zaio; gizonen lehentasunen artean, berriz, kirol- eta ingurumen-jardueretarako espazioak ere nabarmendu behar dira, kulturaz gain.
Boluntariotzaren III. Plana
2024. urtearekin batera, hasiera emango zaio Nafarroako Boluntariotzaren III. Planari. Plan hori Lehendakaritza eta Berdintasun Departamentuak sustatuko du, partaidetza-prozesu baten bidez, eta datozen lau urteetarako Nafarroan boluntariotza sustatzeko neurriak eta lehentasunak ezarriko ditu. Plan berriak 16 lan-ildotan bildutako 59 ekintza jasotzen ditu.
Bere xede nagusia da boluntariotzaren inguruan eta horren parte-hartze aktibo eta solidarioaren garrantziaz gizartea kontzientziatzea. Horrez gain, honako helburu hauek ere ditu: boluntariotza-erakundeen garapena eta hazkundea bultzatzea; inplikatutako eragileen koordinazio-sistema eraginkorra eta iraunkorra garatzea; eta Nafarroako boluntariotzaren errealitateari buruzko ezagutza hobetzea. Berritasunen artean, plan berriak landa-eremuko boluntariotza sustatzea eta laguntzea aurreikusten du.
‘Nafarroa, orotan lagun’ plataformak 218 boluntariotza-programa eskaini zituen esparru ezberdinetan 2023an zehar. Horietan guztietan 737 izen-emate egon ziren.
Nafarroa, Orotan Lagun NASERTIC enpresa publikoak kudeatzen duen Foru Gobernuaren boluntariotza-plataforma da, boluntariotza-erakundeak, elkarteak, osasun-zentroak edo toki-erakundeak boluntario izan nahi duten pertsonekin harremanetan jartzen dituena, herritarrek boluntariotza-jardueretan parte-hartze aktiboa, askea, solidarioa, altruista eta arduratsua izan dezaten sustatzeko.
