Klima-aldaketaren eraginak nabarmenak dira. Zuzeneko ondorioak dituzte pertsonen egunerokoan edo animalien eta landareen portaeran. Egoera horren ondorioz, hainbat neurri hartu behar izan dira azken urteotan.
Klima-aldaketari aurre egiteko azken urteotan mahai gainean jarri diren proposamenak aztertzea da, hain zuzen ere, Bidebarrieta Kulturguneak, urtarrilaren 17an, hartuko duen ‘Bidebarrieta Zientifikoa’ zikloaren hitzordu berriaren xedea.
UPV/EHUren Katedra Zientifikoak antolatu eta ‘Naturaren balioak krisi eko-sozialaren ispilu’ izenburua duen hitzaldian Ikerbasqueko eta BC3ko ikertzaile Unai Pascual aritu da.
Unai Pascualek 25 urte baino gehiagoko esperientzia du ekonomiaren eta ingurumen-aldaketa globalen arteko harremanari buruzko ikerketan, eta klima-aldaketari aurre egiteko ezarritako neurriak ebaluatu dituen talde baten buru izan da. Nature aldizkari zientifikoan argitaratutako ondorioen arabera, ingurumen- eta garapen-estrategiak formulatzerakoan lehentasuna ematen zaie merkatuaren interesei.
Pascual, Ekonomia Ekologikoan graduatua Yorkeko Unibertsitatean Erresuma Batuan 2002an, irakasle titularra izan da Cambridge eta Manchesterreko unibertsitateetan. Gaur egun, Biodibertsitateari eta Ekosistemen Zerbitzuei buruzko Zientzia Politikarako Gobernu arteko Plataforma (IPBES) kide da, eta plataforma horren Naturaren Balioen Ebaluazioko presidentekide ere izan da.
Hitzaldirako sarrera doakoa izango da edukiera bete arte. Bertaratzerik ez dutenek YouTube Kulturgunean eskuragarri dagoen streaming bidez jarraitu ahal izango dute hitzaldia.
