Asiako eta munduko zinema-ekitaldi ospetsuenetakoa den Tokyo International Film Festivalek (TIFF) ongietorria emango die Euskal Herriko bost filmari. Euskal zinemaren nazioarteko leiho hau Etxepare Euskal Institutuaren, Donostiako Nazioarteko Zinemaldiaren eta Lehendakaritzako Kanpo Harremanetarako Idazkaritza Nagusiaren arteko lankidetzaren emaitza da.
TIFF Zinemaldia Japoniako hiriburuan egingo da urriaren 23tik azaroaren 1era bitartean eta euskal zinemari leiho bat eskainiko dio “World Focus” izeneko atalean. Atal horrek munduko zinematografiaren gaur egungo joerak nabarmentzen ditu.
Bost film
Aukeratutako filmen artean, Jaione Cambordak zuzendutako “O corno/The Rye Horn” dago, Donostia Zinemaldiko Urrezko Maskorra eskuratu berri duena. Galiziar eremuan girotua, bere burua berrasmatzen duen emakume baten istorioa kontatzen du filmak, amatasun eta nortasun kontuei aurre egin behar dien bitartean.
“20.000 erle espezie”, Estibaliz Urresola Solagurenek zuzendua, Japoniako estreinaldia egingo du TIFFen Euskal Leihoan. Opera prima honek aintzatespenak lortu ditu jaialdi garrantzitsuetan, Berlinalen eta Malagako Zinemaldian barne, eta Akademiaren Sarietan (Oscar) Espainia ordezkatzeko aurrehautatua izan zen.
Animazioaren mundua Isabel Herguerak zuzendutako “El sueño de la sultana” lanarekin egongo da ikusgai. Euskal Zinemaren Irizar Saria eta Euskal Herriko Gidoigileen Elkarte Profesionalaren Saria jaso zituen Donostia Zinemaldiaren 71. edizioan.
Rosa Zufiak eta Bertha Gaztelumendik zuzendutako “Arnasa betean, emakume zinemagileak” dokumentalak zineman emakumeei buruzko ikuspegi unibertsala eskaintzen du eta Japonian izango du nazioarteko estreinaldia.
Azkenik, Silvia Muntek zuzendutako “Las buenas compañías/In the Company of Women”. Lan horrek Giza Eskubideen Zinemaldian Publikoaren Saria irabazi zuen iaz eta jaialdian ere proiektatuko da.
Bi herrialderen arteko harremana
Ekimen hau Euskadi Japonia 2023 sektore anitzeko proiektuaren parte da. Proiektu horren helburua da Euskadiren eta Japoniaren arteko harremanak sendotzea hainbat arlotan, hala nola kulturaren, gastronomiaren, turismoaren, ekonomiaren eta kirolaren esparruan.
2023an zehar, alde biko programazioa garatzen ari da bi lurraldeetan, sektore anitzeko jarduerak bultzatzeko. Izan ere, Donostiako Nazioarteko Zinemaldiaren 71. edizioak Hiroshi Teshigahara zinemagile japoniarraren atzera begirako saioa programatu du.
