Donostiako Liburutegi Nagusiko San Jeronimo Aretoan “Bruixes – Sorginak – Brujas: Akelarre Ilustratua” erakusketa egongo da ikusgai azaroaren 12ra arte, Fantasiazko eta Beldurrezko Zinemaren 34. Astearen programazioaren barruan. Erakusketak sorginaren irudiak historian zehar izan duen bilakaera aztertzen du, bere sedukzio eta estetika eztabaidaezinari eutsiz.
Sorginaren irudia, irudi ikoniko gisa, herri-kulturan inspirazio-iturri agorrezina izan da. Dela sorgin boteretsu gisa, dela nekromantzikoa edo sendatzaile gisa, dela kezkagarri edo itxaropentsu gisa, beti izan da gure literaturan, beldurrezko zineman, musika ilunean eta beste adierazpen artistiko batzuetan agertzen den elementu fantastikoa. Ehunka ipuin eta kondairen bidez, sorginak diziplina askotako artisten sormenean eragin du.
“Bruixes – Sorginak – Brujas: Akelarre Ilustratua” erakusketak komikigintzan, diseinuan eta ilustrazioan ibilbide oparoa duten 24 emakume ilustratzaile biltzen ditu. Artista horiek bat egin dute gure amets eta amesgaiztoen protagonista izan den fikzioan funtsezkoa den figura horri omenaldia egiteko. Erakusketa, erritual bat bezala pentsatua, magiaz eta fantasiaz beteriko irudiak aurkezten ditu, bisitariek beren kaos koloretsu eta jolasgarriaz gozatzeko propio sortuak.
Erakusketak ikaraz, madarikazioz, sorginkeriaz, magiaz eta okultismoz beteriko mundu batean murgiltzen ditu ikusleak, 24 irudi fantastikoren bidez. “Bruixes – Sorginak – Brujas” ikusizko sorginkeria bezala aurkezten da, zentzumenak liluratu eta harritzen dituena.
Parte hartu duten ilustratzaileen artean daude Sara Bea, Carla Berrocal, Natacha Bustos, Olga de Castro, Genie Espinosa, Mabel Esteban, Ana Galvañ, Higinia Garay, Nadia Hafid, Irene Márquez, Susanna Martín, Mermelada de Sesos, Raquel Meyers, Miriam Persand, Ana Oncina, Laura Pérez, Mireia Pérez, Ane Pikaza, Sara Soler, Clara Soriano, Josune Urrutia, Sandra Uve, Teresa Valero eta Roberta Vázquez.
📷 Olga de Castro
