Nafarroako Osasun Departamentuak, Nafarroako Osasun Publikoaren eta Lan Osasunaren Institutuaren bitartez, “Konexioa segurua da” sentsibilizazio-kanpaina bat jarri du abian. Aipatu kanpainaren xedea da Nafarroan sexu-transmisiozko infekzioen (STI) gorakadari aurre egitea. Izan ere, egunero, hiru infekzio berri baino gehiago diagnostikatzen dira Foru Erkidegoan.
“Konexio hau ez da segurua” edo “Zure konexioa blokeatuta dago” bezalako mezuen bidez, kanpainak prebentzio-neurriak erabiltzearen eta sexu-praktika arriskutsuak saihestearen garrantziaz kontzientziatu nahi du. Horretarako, herritar guztiak beren praktikak modu seguruan berrabiaraztera gonbidatzen ditu. Izan ere, herritar askok ez dute ikusten STIek eragin diezaioketenik, kolektibo jakin batzuekin soilik lotzen dituztelako.
Kanpainak sei kartel, hiru bideo, iragarki bat eta material prebentiboa ditu, eta sexu-transmisioko infekzioak nola kutsatzen diren eta nola prebenitzen diren ezagutarazteko zabaldu dira. Informazio hori ere jasota dago osasunsexuala.nafarroa.eus webgunean.
Horrela, kanpainak sexu-transmisiozko infekzioen intzidentzia murriztea bilatzen du, infekzio horiei buruzko informazioa emanez eta prebenitzeko baliabideak emanez. Kanpainak azpimarratzen du oso garrantzitsuak direla harreman-trebetasunak infekzioen transmisio-katea hausteko, eta gogorarazten du komunikazioa eta harremanen negoziazioa funtsezkoak direla.
Gero eta ohikoagoa den arazoa
Sexu-transmisiozko infekzioak epidemia globala eta osasun publikoko arazo gero eta garrantzitsuagoa dira, erraz transmiti daitezkeelako. Prebalentziak gora egin du munduko herrialde guztietan, eta Nafarroan berretsi egin da nabarmen igo dela zaintza-sistemei jakinarazitako kasuen kopurua, Estatu mailan eta Europan gertatzen den bezala.
Hazkundea nabarmenagoa da 35 urtetik beherako biztanlerian. 25-34 urteko gizonek dute sifilisaren, gonorrearen infekzioa edota linfogranuloma benereoaren intzidentzia handiena. Klamidiak eragindako infekzioa 15-24 urteko emakumeen artean detektatu zen gehienbat, azterketa ginekologikoetan egin ohi den baheketari esker.
Nafarroako Osasun Publikoaren Aldizkarian argitaratutako azken datuen arabera, 2016-2022 aldian sexu-transmisiozko infekzioen intzidentzia goranzkoa izan da Nafarroan, eta tasa altuak lortu ditu. Egunero sexu-transmisioko hiru infekzio berri baino gehiago diagnostikatzen dira Nafarroan. Hala ere, infekzio asko modu asintomatikoan pasa egiten dira, eta, beraz, jakinarazitako kasuek benetako arazoaren zati bat baino ez dute islatzen, sintomarik gabeko infekzioak ere transmiti baitaitezke.
Infekzioen transmisioa
Sexu-transmisioko infekzioak, gehienbat, odolaren, semenaren edo fluxu baginalaren bidez transmititzen dira koito baginal, anal edo sexu oraleko harremanetan, infekzioa duen pertsona batekin prebentzio neurririk ez erabiltzean. Horregatik, sexu-praktika arriskutsuetarako, prebentzio-neurriak erabiltzea gomendatzen da beti, hala nola gizonezkoen preserbatiboa edo kanpo-erabilerarako preserbatiboa, femeninoa edo barne-erabilerarako preserbatiboa eta latex-xaflak.
Hala ere, sexu-praktika guztiek ez dute arriskurik. Arriskurik gabeko praktikek (masturbazioa, joko erotikoak, estimulazio ez genitala, etab.) sexu-transmisioko infekzioak ere prebenitzen dituzte, eta topaketan plazera eta gozamena modu seguruan ezagutzea eta esperimentatzea ahalbidetzen dute.
