Planetak 1,5 graduko berotze-maila gaindituko du 2030 inguruan, industriaurreko aroarekin alderatuta. Hala adierazten du joan den ekainaren 11n ‘Earth System Science Data’ aldizkarian argitaratutako Klima Aldaketa Globalaren Adierazleak 2025 (IGCC) ikerketak.
Txostena 17 herrialdetako 56 erakundetako 70 zientzialarik baino gehiagok egin dute, eta haren arabera, berotzea 1,37 gradukoa da 2025ean. Berotegi-efektuko gasen emisio globalek —atmosferan beroa harrapatzen duten gas guztiek— maximo historiko berri bat lortu zuten 2024an: 56.800 milioi tona, batez ere erregai fosilen errekuntzaren ondorioz.
Planetak Eguzkitik jasotzen du energia, eta gutxi gorabehera kantitate bera itzuli beharko luke espaziora; hala egiten ez duenean, gehiegizko energia bero moduan pilatzen da. Desoreka hori bikoiztu baino gehiago egin da azken hamarkadetan, eta orain errekor berri bat ezarri du. Piers Forster Leedsko Unibertsitateko Klima Etorkizunerako Zentroko zuzendari eta azterlanaren egile nagusiak azaldu duenez, adierazle horrek “gizakiaren eraginik gabe, zerotik gertu egon beharko luke, baina 1970eko hamarkadatik handituz joan da”.
Txostenak kalkulatzen du, halaber, gizateriak zenbat CO2 isuri dezakeen Parisko Hitzarmenean ezarritako 1,5 graduko muga gainditu gabe, karbono-aurrekontua deitzen dena. 2026aren hasieran, 130.000 milioi tonakoa zen marjina hori. Egungo emisio-erritmoari eutsiz gero, hiru bat urtetan agortuko litzateke.
Urte horretan bertan, itsas mailak 23 zentimetroko igoera metatua izan zuen 1901etik, urteko 1,8 milimetroko igoera-tasarekin, pixkanaka azkartzen ari dena
Aurten, ikerketak adierazle berri bat txertatu du: itsasoko bero-boladen egunak, mundu mailan hirukoiztu direnak 1991 eta 2025 artean. 2025ean bakarrik, mota horretako 65 egun erregistratu ziren. Urte horretan bertan, itsas mailak 23 zentimetroko igoera metatua izan zuen 1901etik, urteko 1,8 milimetroko igoera-tasarekin, pixkanaka azkartzen ari dena.
Ikerketaren arabera, 2025a inoiz erregistratutako hirugarren urterik beroena izan zen. Samantha Burgess Copernicuseko Klima Aldaketaren Zerbitzuko zuzendariaren ondokoak azpimarratu du datuek erakusten dutela “azken hamarkadan erregistratutako berotzearen ia guztia giza jarduerek eragin dutela”.
