Irakurketa denbora: Minutu 1
Iñaki Hidalgo Ezenarroren “Orratzaren isiltasuna, Txomin Perez Olalla In Memoriam” lanak Gasteizko Udaleko Kultura Zerbitzuak antolatzen duen FotoArte lehiaketaren XX. edizioko lehen saria eskuratu du. Edizio honetako gai nagusia ‘Arteak eta ofizioak’ izan da eta omenaldia egin dio bere 250. urteurrena ospatzen duen Gasteizko Arte eta Lanbide Eskolari. Guztira, 248 argazkilariren 432 lan jaso dira.
Rocío López, Koldo Mendaza eta Nerea Lekuonak osatutako epaimahaiak, guztira, 2.400 euroko bost sari banatu ditu edizio honetako proposamen nabarmenen artean. Hidalgo Ezenarrori emandako eta 1.000 euroko lehen sariaz gain, beste lau sari hauek ere eman dira:
- Bigarren saria, 700 euro, Camilo José Peña Pérezen “Pastor con perro” lanarentzat izan da.
- Bertako artista saria, 400 euroko zuzkidurarekin, María Luisa Muñozen “Silencio” lanarentzat izan da.
- Lehenengo accesita, 150 eurokoa, María Soledad Urraca Urrutiaren “Tubular” lanarentzat izan da.
- Bigarren accesita, 150 eurokoa ere, Gorka Gómez Echevarríaren “Azken errementaria” lanarentzat izan da.
Parte-hartze errekorra eta tokiko presentzia handiagoa
Lehiaketak parte-hartze nabarmena izan du, 248 egilek aurkeztutako 432 lanekin. Parte-hartzaileen % 49 bertako artistak izan dira, aurreko edizioarekin alderatuta igoera nabarmena islatuz.
Parte-hartzaileei dagokienez, % 41 emakumeak izan dira eta % 8 gazteak. Lanen jatorriari dagokionez, % 65 Euskadikoak dira eta gainerako % 35 Estatuko hainbat lekutatik bidalitakoak izan dira.
Erakusketa ibiltaria
Epaimahaiak aukeratutako 32 argazkiekin, horien artean bost sarituak, erakusketa ibiltari bat osatuko dute. Erakusketa hori maiatzaren 29an hasiko da eta hiriko gizarte-etxe ezberdinetan zehar ibilbidea egingo du. Erakusketa horrek aukera emango die Gasteizko herritarrei lehiaketako proposamen onenak ikusteko eta arte eta lanbide tradizional zein garaikideen interpretazio bisual ezberdinetara hurbiltzeko.
