15 eta 29 urte bitarteko euskal gazteen % 51k egunero edo ia egunero erabiltzen du garraio publiko kolektiboa; kopuru hori 2023koaren ia berdina da eta pandemia aurretik erregistratutakoa baino askoz handiagoa. Hala ere, bizikletaren ohiko erabilerak pisua galtzen jarraitzen du eta % 8,6an kokatzen da, duela hamarkada bat baino gehiagoko mailen azpitik ere. Hala islatzen du Gazteen Euskal Behatokiak egindako ‘Gazteen adierazleak 2025 – Euskadiko gazteen panorama’ azterlanak.
Emakumeek gizonek baino gehiago jotzen dute oraindik ere garraio publikora (% 54,4 eta % 47,6, hurrenez hurren); 20 eta 24 urte bitarteko taldea da gehien erabiltzen duena, % 58,6rekin. Lurraldeka, Bizkaia dago eguneroko erabileraren buruan % 59rekin, ondoren Gipuzkoa (% 45) eta, azkenik, Araba (% 36,6).
Bizikletaz
Egoera oso bestelakoa da bizikletaren kasuan. 2021ean % 23,8ko gehienezkoa lortu ondoren, haren ohiko erabilera % 8,6ra jaitsi da. Araba nabarmen gailentzen zaie gainerakoei, gazteen % 27k erabiltzen baitu egunero, Gipuzkoaren (% 7,2) eta Bizkaiaren (% 3,9) oso aurretik. Halaber, gizonen artean ohikoagoa da haren erabilera emakumeen artean baino.
