Biljana Isailovićek eta Treći Trg argitaletxe serbiarrak 2026ko Etxepare – LABORAL Kutxa Itzulpen Saria jaso dute, Bernardo Atxagaren Zazpi etxe Frantzian eleberria serbierara itzultzeagatik. Sedam kuća u Francuskoj izenburuarekin argitaratu zuten lana 2025ean, eta itzulpenaren kalitateagatik eta euskarazko literatura zabaltzean egindako ekarpenagatik saritu dute.
Epaimahaiak “bikaintzat” jo du Isailovićek egindako itzulpena, eta irakurle serbiarrentzat duen naturaltasuna eta jariakortasuna nabarmendu ditu, baita eleberriaren estiloa, tonua eta giroa mantentzeko gaitasuna ere. Saria Bilboko Bidebarrieta Liburutegian banatu zen, Atxagaren partaidetzarekin.
Atxagaren zortzi itzulpen serbierara
Isailovićek 55 lan inguru itzuli ditu bere ibilbidean, eta horietako zortzi Bernardo Atxagaren liburuak dira. Euskal idazlearen lanen bertsioak hiru argitaletxe serbiarrek argitaratu dituzte 2009tik.
Epaimahaiak Treći Trg argitaletxearen ibilbidea ere aitortu du, Atxagaren bost lan argitaratu baititu, saritutakoa barne. Gainera, idazleak Serbiako liburu-azoka eta literatura-jaialdietan parte hartzea sustatu du, Isailovićekin eta Dejan Matić editoreburuarekin batera.
Isailovićek Bernardo Atxagaren zortzi liburu itzuli ditu serbierara 2009tik.
Etxepare Euskal Institutuak eta LABORAL Kutxak 2015ean sortutako sariak 15 hautagaitza jaso ditu hamabigarren edizio honetan. Sariak 6.000 euroko diru-zuzkidura du, itzultzailearen eta argitaletxearen artean zati berdinetan banatuta, eta biek 3.000 eurorainoko laguntza jaso dezakete argitalpen-herrialdean lana zabaltzeko ekintzak egiteko.
Sariak jatorriz euskaraz idatzi eta argitaratutako literatura-lanen itzulpena eta argitalpena aitortzen ditu. Era berean, lan horiek irakurle, hizkuntza eta kultura berrietara iristeko beharrezkoa den argitalpen- eta sustapen-lana balioesten du.








