Gasteiz da Espainiako 2026ko Bizikletaren Barometroak aztertutako bederatzi hirien artean ohiko txirrindulari gehien dituena. Inkestatutako pertsonen % 44,3k astean behin gutxienez erabiltzen du bizikleta, Espainiako batez bestekoaren (% 23,6) ia bikoitza. Hiriko bizikleta-bideek balorazio ona dute, baina lapurretak eta segurtasuna dira oraindik kezka nagusietako batzuk.
Bartzelonak, sailkapeneko bigarrenak, hamar puntu gutxiago ditu, eta Bilbok, % 18,4rekin, itxi du zerrenda. Gasteizen bizikletan ibiltzen dakiten inkestatuei dagokienez, % 46,5ek astean behin gutxienez pedalei eragiten die, eta % 16,1ek egunero erabiltzen du bizikleta. Kontrako muturrean, % 27,1ek ez du inoiz edo ia inoiz erabiltzen.
Bizikletaz ibiltzearen abantaila nagusia azkartasuna, auto-ilarak saihesteko aukera eta mugitzeko askatasuna dira (% 50,2). Askoz atzerago ageri dira kirola egitea (% 12) eta garraiobide ekologikoa eta kutsatzen ez duena izatea (% 11,3).
Gasteiz da bizikletaz ibiltzean segurtasun handiena sumatzen den hiria; hala ere, lapurretak dira oraindik ere kezka nagusia.
Bizikleta asko erabiltzen da lanera joateko garraiobide gisa. Txirrindularien artean, % 31,2k egunero edo ia egunero erabiltzen du joan-etorri horretarako. Horietatik, % 43 lehen autoz joaten zen lanera, % 30 oinez eta % 20 autobusez.
Azpiegiturek balorazio ona jaso dute. % 97k aitortu du hirian bizikletaz ibiltzeko egokitutako bideak daudela, eta % 84,3k bidegorritik zirkulatzen du. Gainera, % 81,2k uste du Gasteiz hiri atsegina edo segurua dela bizikletaz ibiltzeko; aztertutako hirien artean, ehunekorik handiena da.
Lapurretak eta klima
Bizikleta-lapurreta da bizikleta erabiltzeko oztopo nagusia, erantzunen % 24,7rekin. Ondoren, eguraldia (% 22,5) eta istripua izateko arriskua (% 19,4) ageri dira. Motordun ibilgailuen gehiegizko trafikoa atzerago dago, % 13,2rekin. % 5,9k uste du bidegorri nahikorik ez dagoela, eta % 2,8k bizikletak aparkatzeko leku gutxi dagoela adierazi du.
Lapurretak prebenitzeko, % 81,9k giltzarrapoa erabiltzen du, eta % 38,7k leku seguruetan aparkatzen du.
Gidariei buruzko iritziak banatuta daude. % 51k uste du bizikletaz dabiltzanak errespetatzen dituztela, eta % 47k kontrakoa uste du.
Udalak 17.000 bizikleta-aparkaleku baino gehiago ditu espazio publikoan, baita 1.400 plaza baino gehiago biltzen dituzten VG Biziz sareko 22 aparkaleku seguru ere. Horrez gain, Mugibike zerbitzu publikoa eskaintzen du, bizikleta elektrikoak maileguan hartzeko.
