IDCk ‘European Mobile Phone Tracker’ txostenean jasotako aurtengo bigarren hiruhilekoan datuen arabera, mendebaldeko Europan 43,3 milioi sakeleako telefono saldu ziren. Modu honetan, gailu hauen salmentak %2,6an hazi dira aurreko urteko tarte berarekin alderatuta. Telefono hauetatik guztietatik, ‘featured phones’ (smartphone ez diren gailuak) delakoen salmentak %27an jaitsi dira, guztira, 10,7 milioi unitate saldu direlarik. Smartphonen salmentak, berriz, %19an hazi dira eta, guztira, 32,9 milioi telefono saldu dira.
Sistema eragileen artean, Androidek nagusi izaten jarraitzen du. Aipatu epean saldutako telefono guztien artean %71ak sistema eragile hau zuen (23,2 milioi). Android atzetik Applen iOS-a aurkitzen da baina bi puntuko galerarekin (%19,4tik %17,4ra pasa da).
Ekoizleen artean Samsung da nagusi. Aztertutako epe horretan Samsung-ek 18,8 milioi telefono saldu ditu eta bere merkatu kuota %40tik gorakoa da. Bigarren postuan, Microsoftek erosi berri duen Nokia finlandiarra kokatzen da, 5,7 milioi gailurekin (%13,2). Dena den, Nokia bostgarren postuan aurkitzen da smartphonen salmentetan. Hirugarren postuan Apple eta bere iPhone-a aurkitzen dira, 5,7 milioi unitaterekin eta %13,2ko merkatu kuotarekin. Jarraian Sony (%11,3) eta LG (%8) kokatzen dira.
