Euskadiko 18 eta 29 urte bitarteko gazteen ia bi herenak (% 63) Europar Batasunean konfiantza duela dio. Gazteek azaltzen duten konfiantza-maila 30 urtetik gorako biztanleriak duen konfiantza-maila (% 56) baino handiagoa da.
Europar Batasunarekiko konfiantza nabarmen hazi da azken urteetan. Horrela, 2010. urtean EBn konfiantza zutela adierazten zuten 30 urtetik beherako gazteen portzentajea % 47koa zen bitartean, hamar urte beranduago portzentaje hori 16 puntu altuagoa da. Konfiantza-mailarik baxuena 2014. urtean erregistratu zen, nagusiki, aurreko urteetan pairatutako krisi ekonomikoaren eta horren aurrean Europak hartu zituen neurri zorrotzen ondorioz.
Emakume gazteek konfiantza handiagoa dute EBn gizon gazteek baino (% 66 eta % 60, hurrenez hurren), eta 25 urtetik beherakoen konfiantza-maila arinki handiagoa da 25 eta 29 urte bitartekoena baino (% 64 eta % 61, adin-talde batean eta bestean).
Datu horiek Gazteen Euskal Behatokiak 2019an egindako Gazteen Argazkiak 23 azterlanetik datoz.
