BAIC-Euskadiko Adimen Artifizialaren Zentroak teknologia horrek Euskadin duen ezarpenaren inguruko lehen txostena aurkeztu du. Txostenak, nagusiki, teknologia horrek EAEn izan duen hazkundea azpimarratzen du. Bildutako datuen arabera, une honetan, EAEko erakundeen % 12 inguruk AA erabiltzen du eta 771 dira Euskadiko adimen artifizialaren ekosistema osatzen duten eragileak. Talde horren barruan daude, besteak beste, enpresa hornitzaileak eta erabiltzaileak, startup-ak eta erakunde publikoak.
Txostenak, gainera, hazkunderako aukera handiak daudela azpimarratzen du. Adibidez, nabarmentzekoa da AAren 400 kasu baino gehiago erregistratu direla Euskadin, jarduera profesional, zientifiko eta teknikoetan (% 25) eta informazioaren eta komunikazioen sektorean (% 24).
Inpaktu ekonomikoa eta espezializatutako enplegua
Txostenak jasotzen duenez, AA irtenbideak eskaintzen dituzten enpresa hornitzaileek 105 milioi euro fakturatu zituzten. Teknologia hori ezarri zuten enpresen kasuan, berriz, batez beste, beren diru-sarrerak % 9an igotzea lortu zuten.
Enpleguari dagokionez, une honetan, 7.500 pertsona baino gehiago ari dira lanean euskal AAren ekosisteman, hots, biztanleria aktiboaren % 0,7 inguru. Talde horretatik, % 17 inguru ikerketa lanetan ari da eta beste % 83, berriz, adimen artifizialarekin harremana duten enpresa-jardueretan.
Adimen Artifizialak Euskadin izan duen hazkundea formakuntza espezializatuan oinarritzen da. 35 programa akademiko baino gehiago daude, guztira 34.000 irakaskuntza-ordu baino gehiago, eta horietatik urtero IAko 900 espezialista inguru egresatzen dira. Era berean, txostenak dio Euskadin arautu gabeko prestakuntza-eskaintza zabala dagoela arlo horretan.
Errendimendu altuko azpiegituren garapenari dagokionez, txostenak Euskadin konputaziorako errendimendu altuko sei zentro (HPC) daudela azpimarratzen du. Gainera, 2026. urtean, zentro horiek superordenagailu bat izango dute erabilgarri eta, horrela, proiektu teknologiko aurreratuak garatzeko aukera handiagoak izango dituzte.
BAIC-Euskadiko Adimen Artifizialaren Zentroa 2021. urtean sortu zen eta funtsezko funtzioa du Euskadin den adimen artifizialaren garapenean. Enpresa handiek, startup-ek, IKT hornitzaileek, ezagutza-eragileek eta Eusko Jaurlaritzak bultzatuta, Euskadiko Adimen Artifizialaren Zentroa helburua da Adimen Artifiziala euskal industrian bizkortzea eta Euskal Autonomia Erkidegoan kultura teknologikoa sustatzea.
