Gasteizko Zaramaga auzoko Laudio plazak Urban Fest Zaramaga jaialdiaren bigarren edizioa hartuko du datorren irailaren 11n eta 12an. 14 eta 30 urte bitarteko gazteei zuzendutako hiri-kulturako jaialdiak musika, artea eta hiri-kirolak uztartuko ditu bi egunez.
Egitarauak hainbat adierazpen artistiko, hala nola dantza, graffitia eta diseinua, eta hainbat kirol-diziplina, besteak beste skatea, parkourra, kalistenia eta 3×3 saskibaloia, uztartuko ditu. Horrez gain, kartelak DJ saioak, kontzertuak, erakustaldiak, tailerrak, lehiaketak eta arte urbanoko azoka txiki bat ere bilduko ditu.
Jaialdia gazte-elkarteen eta antolakuntzan laguntzen duen gazte talde eragile baten artean diseinatu da. Gainera, hainbat gaztek protagonismo berezia izango dute, tailerrak eta jarduerak dinamizatuz, baita beren sormen lanak zein kirol-erakustaldiak eskainiz ere.
Izena emateko epea irailaren 10era arte
Egitaraua irailaren 11n, ostiralean, hasiko da 18:00etan, eta 23:30era arte luzatuko da. Lehen jardunaldian 3×3 saskibaloi txapelketa, graffiti guneak, tailerrak, skate erakustaldiak eta kalistenia zein parkour entrenamenduak izango dira. Irailaren 12an, larunbatean, 12:00etatik 00:30era bitartean, jaialdiak tailerrak, DJ saioak, arte urbanoko azoka txikia, kirol-jarduerak eta kontzertuak eskainiko ditu.
Dantza, kalistenia, 3×3 saskibaloia eta parkour tailerretan parte hartu nahi dutenek irailaren 10era arte eman dezakete izena udalaren webgunearen bidez. Adingabeek legezko tutoreen baimena beharko dute.
Jaialdia auzoa Biziberritzeko Planaren barruan kokatzen da, eta gazteei aisialdi osasungarrirako aukera eskaintzea du helburu. Horrez gain, gazteen sormena indartu eta Zaramaga dinamizatu nahi du, jarduera ireki eta parte-hartzaileen bidez. Ekimena Gasteizko Udaleko Gazteria, Gobernu Irekia eta Gizarte Etxeen Zerbitzuek antolatu dute, Eusko Jaurlaritzaren laguntzarekin.
Urban Fest Zaramagaren gakoak
- Datak: irailaren 11 eta 12a
- Ostiraleko ordutegia: 18:00etatik 23:30era
- Larunbateko ordutegia: 12:00etatik 00:30era
- Lekua: Laudio plaza, Zaramaga auzoa
- Gomendatutako adina: 14 eta 30 urte bitartean
- Tailerretan izena ematea: irailaren 10era arte, udalaren webgunean
