Egilea: Jon Mikel Zabalegi
Argazkia: shutterstock.com
Hitz kopurua: 468
Irakurketa denbora: 2 Minutu
Itzultzaileak, historialariak eta idazle/kazetariak. Microsoftek ezagutzera eman duen ikerketa baten arabera, hiru horiek dira adimen artifizialaren erabileraren ondorioz arriskuan diren hiru lanbide nagusiak. Txostenak teknologia horren erabilerak mehatxupean jarri dituen 40 lanbide identifikatu ditu. Funtsean, “Working with AI: Measuring the Occupational Implications of Generative AI” izenburua duen azterlanak ondorioztatu duenez, lanbide kaltetuenak ahalegin intelektual teknikoa eskatzen duten lanbideak izango dira, hala nola informatika, matematika edo bulegoko kudeaketa. Txanponaren beste aldean, lanbide praktikoek apenas pairatuko dute teknologia horren eragina. Hor daude, adibidez, makineria astuneko operadoreak, garbitzaileak, igeltseroak, osasun esparruko langileak…
Azterlana erabiltzaileek Microsoft Bing Copilot adimen artifizialeko zerbitzuarekin izandako 200.000 solasalditan oinarritzen da. Horietan, erabiltzaileek, nagusiki, informazioa biltzea eta idazketa lanak egitea eskatzen diote adimen artifizial sortzaileari.
Eskulana vs ordenagailua
Txostenak ez du behin betiko iragarpenik ematen, baina joera argi bat erakusten du: zuzeneko eskulana behar duten lanbideek ez dute AA sortzailearen mehatxua izango. Ostera, ordenagailu baten aurrean egin beharreko lanbideetan aldaketa sakonak izango dira eta, zenbait kasutan, baliteke lanbide horiek guztiz desagertzea. AAren mehatxupean den sektoreren batean lan egiten duten horiek trebetasun osagarri berrietan trebatu beharko dute beren burua. Izan ere, esan ohi den bezala, mehatxu batean atzean beti dago aukera berri bat. Hortaz, Adimen artifizialeko tresnen erabilera, datuen analisia, pentsamendu kritikoa, hizkuntzak edo estrategia digitalen diseinua bezalako trebetasunak aukera bat izan daitezke lan merkatu berrira egokitzeko.
Gazteak kaltetuenak?
Gaur egun lan-merkatuan den joera ikusita, garbi dago adimen artifizialaren ezarpenak milaka kaleratze eragingo dituela. Hala iragarri dute, adibidez, Amazonek eta Microsoftek berak. Aditu batzuen arabera, litekeena da adimen artifizialak langile hasiberri gazteei eragitea, haien zereginak samurragoak izaten baitira, eta, ondorioz, automatizatzeko errazagoak.
AAk zenbait lanbide desagerraraziko ote duenaren inguruko eztabaida mahai gainean dago. AA sortzailea enpresa eta langile askoren egunerokotasunaren parte bihurtu da
Beste aditu batzuen ustez, berriz, esperientzia gehien duten langileak izango dira kaltetuenak, nolabait, langile gazteek adimen artifizialera egokitzeko gaitasun handiagoa izango dutelako.
Ez da eztabaida txikia. adimen artifizialaren ezarpenak , bereziki, gazteak kaltetzen baditu, hezkuntza-sistemaren eta, batez ere, unibertsitatearen oinarriak birplanteatu beharko lirateke, unibertsitate-ikasketak jada ez bailirateke enpleguaren berme izango. Ostera, kaltetuenak langile zaharrenak badira, horrek lurrikara sozial bat eragingo luke, maila ekonomikoan zein politikoan.
Arriskuan dauden 40 lanbideen zerrenda
Microsoftek egin duen azterlanaren arabera, hauek lirateke adimen artifizialaren eraginez mehatxupean diren 40 lanbideren zerrenda:
- Interprete eta itzultzaileak
- Historialariak
- Hegaldi-laguntzaileak
- Salmenta-zerbitzuetako ordezkariak
- Idazleak eta egileak
- Bezeroen arretarako langileak
- CNC erraminten programatzaileak
- Telefono operadoreak
- Bidaia-agentzietako langileak
- Irratiko esatariak eta DJak
- Artekaritzako bulegariak
- Nekazaritza eta etxeko administrazioko hezitzaileak
- Telefono bidezko saltzaileak
- Hoteletako atezainak
- Zientzialari politikoak
- Albisteen analistak, berriemaileak eta kazetariak
- Matematikariak
- Erredaktore teknikoak
- Testu zuzentzaileak
- Harreragileak
- Editoreak
- Negozio irakasleak
- Harreman publikoko espezialistak
- Produktu sustatzaileak
- Publizitate-salmentetako langileak
- Kontu berriko bulegariak
- Estatistika-laguntzaileak
- Salmahaietako bulegariak
- Datu-zientzialariak
- Finantza-aholkulariak
- Artxiboko langileak
- Unibertsitateko ekonomia irakasleak
- Web garatzaileak
- Kudeaketako analistak
- Geografoak
- Modeloak
- Merkatuaren ikerketarako analistak
- Segurtasun publikoko telekomunikatzaileak
- Telefonoguneetako operadoreak
- Bibliotekonomiako irakasleak
