Egilea: José Poza
Argazkia: navarra.es
Hitz kopurua: 214
Irakurketa denbora: Minutu 1
Nafarroako Gazteriaren Institutuak (NGI) euskaraz eta gaztelaniaz prestatutako hiru liburukik osatzen duten ‘Aisialdiko begiralearen eskuliburua’ izenburuko bilduma argitaratu du. Bildumak, aisialdian egiten den hezkuntzari buruz 56/2023 Foru Dekretuak zehazten dituen edukiak biltzen ditu. Argitalpena Nafarroan aintzatespen ofiziala duten sei eskoletako ikasle zein irakasleentzat gida bat izango da. Eskola horietan 257 begirale eta 19 zuzendari trebatu dira 2025. urtean zehar.
Foru Gobernuak onartutako eskoletan titulazio horiek ematen eta ikasten dituztenentzat gida eguneratua eta irisgarria eskaini nahi du bildumak. Hiru liburukiak jada doan deskarga daitezke Nafarroako Gazteriaren Institutuan.
Eskuliburuak hezkuntza ez-formala aurkezten du, parte hartzetik, inklusiotik eta hazkunde pertsonaletik abiatuta haurren eta gazteen ikaskuntza laguntzen duen prozesu gisa. Argitalpenean hezkuntza mota horren garrantzia nabarmendu nahi izan da, hezkuntza formala osatzen duen garapen sozialerako eta komunitarioko gune gisa.
Hiru liburuki, askotariko edukiak
Bilduma osatzen duten hiru liburukiek titulu ofiziala lortzeko landu beharreko formakuntza-eremu ezberdinak jorratzen ditu. Lehenengo liburukian haur eta gazteen aisialdian ematen diren hezkuntza-jarduerak jorratzen dira; bigarrenean, talde- eta hezkuntza-prozesuak; eta, hirugarrenean, animaziorako teknikak eta baliabideak.
Edukien artean, banakako eta taldeko aniztasunaren arabera esku hartzeko teknikak sartzen dira, hala nola hezkidetza, kulturarteko esku-hartzea eta desgaitasuna duten pertsonekin lan egitea. Animazio-, adierazpen- eta sormen-teknikak, jolasaren pedagogia eta haren balio hezitzailea eta ingurumen-hezkuntza ere biltzen dituzte.
