Animedon-ek, Donostiako Fantasiazko eta Beldurrezko Zinemaren Asteko anime-topaketak, hirugarren edizioa ospatuko du urriaren 26tik azaroaren 6ra bitartean. Programazioak hiru estreinaldi, Shin chan-i egindako omenaldia, yōkai-ei buruzko erakusketa bat eta euskarazko zuzeneko podcast bat bilduko ditu.
Victoria Eugenia antzokiak Shin chan-i egindako omenaldi-saio bat hartuko du urriaren 31n, 12:00etan. Azaroaren 26an 25 urte beteko dira telesailaren euskarazko lehen emanalditik. Irati Errandonea kazetariak laurogeita hamarreko hamarkadako hiru atal aurkeztuko ditu, bai eta Nekane Sarobe bikoiztailearekin izandako solasaldia ere. Sarobek pertsonaiari ahotsa jarri dio 500 atal baino gehiagotan.
Sarrera doakoa da. Gonbidapenak urriaren 26ko 11:00etatik aurrera eskuratu ahal izango dira, Victoria Eugenia eta Principal antzokietako leihatiletan eta Donostia Kulturaren webgunean.
Hiru estreinaldi urriaren 30etik azaroaren 1era
Victoria Eugenia antzokian Euskadin estreinatuko diren hiru film luze proiektatuko dira. Urriaren 30ean Puella Magi Madoka Magica. La noche de Walpurgis. El ascenso filma iritsiko da, tetralogia baten laugarren atala.
Grotesqqque filma urriaren 31n estreinatuko da Victoria Eugenia antzokian, Japoniako areto komertzialetan baino sei egun lehenago.
Grotesqqque filma urriaren 31n estreinatuko da Victoria Eugenia antzokian, Japoniako areto komertzialetan baino sei egun lehenago. Azaroaren 1ean, berriz, Peleliu – Guernica of paradise filma emango da, Peleliu uharteko guduari buruzkoa. Sarrerak urriaren 26ko 11:00etatik aurrera jarriko dira salgai.
Euskarazko podcasta eta yōkai-ei buruzko erakusketa
Flop Kultura podcastak zuzeneko saio bat eskainiko du euskaraz urriaren 26an, 19:00etan, Victoria Eugenia antzokiko Club aretoan. Eneko Garcíak eta Danel Galdaerak animeak euren haurtzaroan eta nortasunean izandako eraginaz hitz egingo dute.
Álvaro Herranzen (Fuego Fatuo Art) yōkai-ei —Japoniako folkloreko espirituei— buruzko erakusketa urriaren 30etik azaroaren 15era bisitatu ahal izango da San Jeronimo Udal Liburutegian.
Animedon 2026
- Topaketaren datak: urriaren 26tik azaroaren 6ra
- Flop Kultura podcasta: urriaren 26an, 19:00etan, Victoria Eugenia antzokiko Club aretoan
- Shin chan-i omenaldia: urriaren 31n, 12:00etan; sarrera doan, gonbidapenarekin
- Estreinaldiak Victoria Eugenia antzokian: urriaren 30ean (Madoka Magica), urriaren 31n (Grotesqqque) eta azaroaren 1ean (Peleliu)
- Yōkai-ei buruzko erakusketa: urriaren 30etik azaroaren 15era, San Jeronimo Udal Liburutegian
- Gonbidapenak eta sarrerak: urriaren 26ko 11:00etatik aurrera, Victoria Eugenia eta Principal antzokietako leihatiletan eta Donostia Kulturaren webgunean
