Lerroburuan azaltzen diren bi kontzeptu horiek ulertzea funtsezkoa da sexualitate segurua, errespetuzkoa eta gogobetegarria izateko. Onartzea ez da bakarrik “bai” edo “ez” esatea, baizik eta eroso sentiarazten gaituena eta sentitzen ez duguna modu argi eta kontzientean komunikatzea. Adostasuna akordio librea, informatua eta itzulgarria da sexu-interakzio batean parte hartzen duten pertsona guztien artean. Horrek esan nahi du borondatezkoa, informatua eta alda daitekeen zerbait dela.
Baimena eta errespetua txanpon bereko bi aldeak dira. Bikotekidea entzutea, bere mugak ulertzea eta horiek modu argian komunikatzea funtsezkoa da norberaren zein bikotearen ongizatea babesteko.
Pertsona guztiok ditugu gure muga fisikoak, emozionalak eta psikologikoak. Horiek ezagutzea eta ezagutzera ematea lagungarri izan daiteke gaizki-ulertuak eta egoera deserosoak ekiditeko. Hortaz, mugak guztiz ezberdinak izan daitezke bikotearen, unearen edo esperientziaren baitan. Horregatik, garrantzitsua da horiek aldizka berraztertzea eta komunikatzea. Baina, nola komunikatu norberaren mugak?
Lehenik eta behin, lehen pertsonan hitz egin beharko duzu: azaldu zer duzun gustuko eta zerk eragiten dizun deserosotasuna. Komunikatzean argia izan behar duzu, baita malgua ere; azaldu zure mugak, baina horiek inposatu gabe eta komunikaziorako eta elkarrizketarako arteak zabalik utzi. Ildo berean, zure bikotekideak esateko duen hori arretaz entzun, bere emozioak baliozkotuz eta epaitu aurretik zalantzak argituz. Hori guztia egiteko, gainera, egokia da momentu aproposa aurkitzea, bereziki, sexu-harremanen edo eztabaiden uneak saihestuz.
Bikotekidea entzutea, bere mugak ulertzea eta horiek modu argian komunikatzea funtsezkoa da norberaren zein bikotearen ongizatea babesteko.
Izan ere, oso zaila da gauza guztietan erabateko adostasuna lortzea. Gakoa errespetuz negoziatzea eta biak eroso sentitzeko topaguneak bilatzea da. Adibidez, estrategia egoki bat modu adostuan arakatzea izan daiteke, esperientziak pixkanaka probatuz eta bientzat funtzionatzen duenaren arabera doituz. Ezarritako mugak ez dira betirako, berraztertu eta eguneratu daitezke, desirak eta beharrak denborarekin aldatzen direlako. Aldeak onartzea ere funtsezkoa da. Esan bezala, oso zaila da erabateko adostasun batera iristea eta, horregatik, garrantzitsua da oreka osasungarri bat aurkitzea.
Azkenik, aipatu behar da muga horiei buruz hitz egiteak zenbait onura dakarrela, esate baterako, segurtasun eta konfiantza handiagoa sortzen duela harremanean eta norberarengan, intimitatearekin lotutako antsietatea, errua edo beldurra murrizten duela, emozio- eta sexu-komunikazioa hobetzen duela eta harreman atseginagoak eta errespetuzkoak sortzen dituela.
Laburbilduz, adostasuna eta mugak ez dira arauak soilik, baizik eta gure ongizatea babesteko eta sexualitateaz kontzienteki gozatzeko tresnak. Gustatzen zaigunaz eta ez zaigunaz hitz egiteak, besteari entzuteak eta modu irekian negoziatzeak, sexu-esperientzia segurua, atsegina eta positiboa bihurtzen du inplikatutako pertsona guztientzat.
