Konekta 3 programa Iruñeko 225 langaberengana iritsi da jardunean eman dituen lehen zortzi hilabeteetan. Guztira, 118 pertsonak amaitu dute laneratzeko ibilbidea, eta beste 107k laguntza-prozesuan jarraitzen dute.
Konekta 3 programa Iruñeko Udalak eta Nafarroako Gobernuak sustatzen dute elkarlanean, Nafarroako Enplegu Zerbitzuaren – Nafar Lansareren bidez. Parte-hartzaile guztiak Iruñean erroldatuta daude, eta enplegu-eskatzaile gisa izena emanda.
73 kontratu eta 65 laneratze
Lehen zortzi hilabete hauetan 73 lan-kontratu formalizatu dira. Sei pertsonak kontratu bat baino gehiago sinatu dute: bostek bina kontratu sinatu dituzte, eta pertsona batek lau. Guztira, 65 pertsonak lana lortu dute programari esker.
Talde teknikoak 177 talde-jarduera eta 1.354 banakako jarduera uztartu ditu, batez beste sei hitzordu eskainiz pertsona bakoitzeko. Arreta-intentsitate hori parte-hartzaileen gizarte- eta ekonomia-kalteberatasunari erantzuteko diseinatu da.
Programak 225 enplegagarritasun-diagnostiko egin ditu, eta 1.532 laguntza-zerbitzu eskaini dizkie parte-hartzaileei.
Artatutako pertsona guztien % 58 emakumeak dira, eta % 42 gizonak. % 60 baino gehiagok errenta bermatua edo bizitzeko gutxieneko diru-sarrera jasotzen dute. Parte-hartzaileen batez besteko adina 36 urtekoa da, eta erdiak 30 eta 45 urte bitartekoak dira. Programak 31 herrialde ezberdinetako parte-hartzaileak biltzen ditu.
Adin-mugarik eta errenta bermatuaren baldintzarik gabe
Aurreko bi edizioetan ez bezala, Konekta 3 programak ez du errenta bermatua edo bizitzeko gutxieneko diru-sarrera jasotzea eskatzen, eta ez du adin-mugarik ezartzen. Parte hartzeko baldintzak hauek dira: Iruñean erroldatuta egotea, enplegu-eskatzaile gisa izena emanda egotea eta gehienez Derrigorrezko Bigarren Hezkuntzako titulazioa izatea.
Programak 13 hilabeteko iraupena du, 2025eko urritik 2026ko urrira bitartean, eta 275.000 euroko aurrekontua du. Nafarroako Gobernuak 225.000 euro jartzen ditu (guztizkoaren % 81), eta Iruñeko Udalak gainerako 50.000 euroak finantzatzen ditu.
Lan-orientazioko profesionalek 15 talde-tailer eman dituzte, hamaika gairen inguruan. Horien artean daude enplegua bilatzeko adimen artifizialaren erabilera eta lan-elkarrizketak prestatzeko teknikak. Programak, gainera, Iruñeko enplegu- eta prestakuntza-baliabideetara bisitak zein gaitasun digitalen inguruko ikastaroak antolatu ditu.
Konekta 3 programaren gakoak
- Iraupena: 13 hilabete, 2025eko urriaren 1etik 2026ko urriaren 31ra.
- Aurrekontua: 275.000 euro (225.000 euro Nafarroako Gobernuak eta 50.000 euro Iruñeko Udalak).
- Baldintzak: Iruñean erroldatuta egotea, enplegu-eskatzaile gisa izena emanda egotea eta gehienez DBHko ikasketa-maila izatea.
- Trebatu beharreko pertsonak (helburua): 270 pertsona.
- Aurreko edizioak: Lehenengoak errenta bermatua edo bizitzeko gutxieneko diru-sarrera jasotzen zuten 30 urtetik beherako 87 pertsona artatu zituen; bigarrenak, berriz, iraupen luzeko langabezian zeuden 30 urtetik gorako 135 pertsona.
- Talde teknikoa: Gizarte- eta lan-orientazioko hiru teknikari, laguntza-enpleguko teknikari bat eta lanaldi erdiko administratzaile bat.
