Egilea: Jose Poza
Argazkia: Shutterstock.com
Hitz kopurua: 438
Irakurketa denbora: 2 Minutu
Amaitu berri den urtetik hona, milaka mezu zabaldu dira Whatsapp-eko taldeen bidez urtarriletik aurrera Ogasunak edozein Bizum-engatik zergak kobratzen hasiko zela ohartaraziz. Kezka, besteak beste, jatetxe batean kontuan zatitu, opari baterako dirua bidali edo senide bati diruz laguntzen dioten horien guztiengana iritsi da.
Hala ere, informazio hori faltsua dela azpimarratu behar da. Urte berriarekin batera indarrean sartu den arau berriak bakarrik enpresei eta langile autonomoei eragingo die, baina ez partikularrei. Lagun edo senideen arteko ordainketak gastuak partekatzeko, opariak egitea edo ohiko laguntza ekonomikoak ez dira deklaratu behar izango eta, hortaz ez dute betebehar fiskal berririk eragingo.
Arau berriak dioena
Nahasmena aurtengo otsailetik aurrera bankuei hilero Zerga Agentziara informazioa bidaltzera behartzen duen lege-aldaketa baten ondorioz sortu da. Baina betebehar hori enpresaburuei eta profesional autonomoei bakarrik dagokie.
Legeak jasotzen duenez, finantza-erakundeek “enpresaburuek edo profesionalek edozein motatako txartelen bidez egindako eragiketak jakinarazi beharko dituzte, baita telefono mugikorreko zenbakiei lotutakoak ere”. Hau da, jarduera ekonomiko bat egiten dutenek jasotako kobrantzak. Aitorpen horretan hilean kobratutako kopuru osoa zehaztuko da, ez eragiketa bakoitzaren datu zehatzak.
Aldaketa handirik ez
Kasurik ohikoenak dira, hain zuzen ere, kezka gutxien sortu behar dutenak. Jatetxe bateko gastuak banatzea, lagun bati egindako opari baten ehuneko bat ordaintzea edo lagunen artean gastuak partekatzea ez du inolako ondorio fiskalik izango.
Ordainketa horiek partikularren artean egiten dira eta lege berritik kanpo geratzen dira. Horrela, erabiltzaileek Bizuma erabiltzen jarraitu ahal izango dute orain arte bezala.
Senideen arteko laguntzak
Gurasoek emandako 200 euro horiek hilabetea zenbaki gorritan ez amaitzeko edo senideen arteko ohiko transferentziak ere lege berritik kanpo geratu dira. Horrelako eragiketek e dute zergarik ordaindu behar ez direlako inolako jarduera ekonomikotik eratortzen.
Salbuespenezko kasuetan bakarrik, hala nola auto bat erosten laguntzeko 10.000 euroko transferentzia, har liteke dohaintzatzat. Eta hori horrela zen 2026a baino lehen, ordaintzeko erabilitako modua edozein izanda ere.
Lehendik zegoena
Betebehar fiskala dakarren egoera bakarra zerbitzu enpresagatiko edo profesionalengatiko kobrantzak dira. Baina hori ez da berria. Bere jardueragatik fakturatzen duen edozein pertsonak sarrera horiek aitortu eta zergak ordaindu beharko ditu eta berdin dio eskudirutan, txartelarekin, transferentzia bidez edo Bizum bidez kobratzen duen. Hortaz, aurten izango den nobedadea da hemendik aurrera bankuek automatikoki Ogasunera adierazi beharko diotela hileko kopuru osoa, baina aitortzeko beharra bazen lehendik ere.
Ordaintzeko moduak ez ditu zergak zehazten
Kontuan hartu behar da ogasunarekiko betebeharrak ez daudela kobratzeko moduaren baitan, sarreraren izaeraren baitan baizik. Hortaz, ekonomia-, merkataritza-, enpresa- edo lanbide-jarduera batetik datozen kobrantzek bakarrik ordaintzen dituzte zergak. Hori horrela zen araudi berriaren aurretik eta horrela jarraituko du. Araudian izan den moldaketaren xedea da enpresa eta autonomoen jarduera ekonomikoaren gaineko kontrola hobetzea, ez partikularren arteko ordainketak zergapetzea.
