Irakurketa denbora: Minutu 1
Donostiako Jazzaldiak Txillida Leku museoko programazioa mantendu eta indartuko du bere 60. edizioa ospatzeko. Aurreko edizioetan emaitza bikainak jaso dituen lankidetzarekin jarraituz, sei kontzertu berezi eskainiko dira artea eta natura uztartzen dituen gune berezia den Txillida Lekun.
Programatutako kontzertuen artean bi estreinaldi izango dira. Uztailaren 19an, Oreka TX euskal taldea eta Kolonbiako Phonoclórica taldea batzen dituen Bascolombia proiektua aurkeztuko da. Hurrengo egunean, uztailaren 20an, publikoak “Dichosos tributos” proposamenaz gozatu ahal izango du, Iñaki Salvador eta Marco Mezquida piano-jole ezagunek egindako proposamen bateratua.
Aurtengo edizioan izango den nobedade nagusietako bat Txillida Lekuko Zabalaga baserriak lehenengoz hartuko dituen kontzertuak dira. Uztailaren 26an Lew Tabackin txirulari eta saxofoi tenorraren laukotea arituko da, eta uztailaren 27an, berriz, Jordina Millà piano-jolearen eta Barry Guy kontrabaxu-jolearen txanda izango da.
Chillida Lekuko kontzertuen eskaintza osatzeko, Txikijazz programazioaren barruan, bi kontzertu izango dira helduez lagundutako haurrei zuzenduak:
- uztailaren 25ean Claire Martin abeslari britainiarra arituko da
- uztailaren 26an, berriz, Arima Soul euskal taldea.
Ekitaldi hauetara iristea errazteko, Galarretan aparkaleku bat prestatuko da museorako doako autobus-zerbitzu batekin uztailaren 19, 20, 25 eta 26ko goizeko kontzertuentzat. Uztailaren 26ko (arratsaldean) eta 27ko kontzertuetara doazenek, 19:30ean programatuak, zuzenean aparkatu ahal izango dute museoko aparkalekuan.
Jazzaldiaren eta Txillida Lekuren arteko lankidetza honek musika-proposamen anitzez gozatzeko aukera ematen du gune berezi batean, musikaren esperientzia museoak eskaintzen duen ingurune artistikoarekin uztartuz.
