Gasteizko Udalak 2023-2024 denboraldirako kultur ikastaroen programa aurkeztu du. Guztira, udalak 19 ikastaro eskainiko ditu, 671 plazekin, aurreko denboraldian baino % 12 gehiago. Izena emateko epea irailaren 5era arte egongo da zabalik.
Herritar guztiei zuzendutako ikastaroak adituek emango dituzte, zorroztasun zientifikoa eta dibulgazioa uztartuz. Besteak beste, Juan Ibarrondo idazle eta kazetariak, Jasone Arrausi, Ander Gondra eta Ricardo Garay arte historialariek, La Otra Mitad Astronomia Elkarteak, Alejandra Spagnuolo eta Geraldine Ramírez musika adituek eta Jorge Moneo eta Jorge Barrio zinemagileek hartuko dute parte.
Eskaintza zabala
Tokiko ondaretik hasi eta gai globaletaraino, interes ugari biltzen dituzte ikastaroek. Adibidez, Gasteiz eta Arabako errealitate hurbilenari lotutako ikastaroak (Gasteizko auzoen historia; Aintza eta ahanztura Arabako XIX. mendean; Arabako aztarnategi arkeologiko nagusiak…); Nazioarteko gatazkak ulertzen lagunduko duten ikastaroak; Genero gaiei buruzko monografikoak (Emakumeak eta musika: Erdi Arotik Erromantizismora arte; Feminismoak artean 1960ko hamarkadatik gaur egunera…); Arteak eta humanitateak (Erdi Aroko eskuizkribuak; Ekialdeko arteari buruzko sarrera; zinemaren historiaurrea eta lehen pausoak; Zinemako zazpi maisulanei buruzko azterketa; Jazzaren historia; Homeroren Odiseari buruzko sarrera…); Beste gai batzuk: elikadura osasungarria, psikologia, ornitologia, mikologia, astronomia eta ardo-dastaketa.
Eskaintza hiruhilekotan banatzen da, beraz, ikastaro batzuk urrian hasiko dira, beste batzuk urtarrilean eta azkenak apirilean. Saio bakoitzean 7-15 saio emango dira, astean egun bat edo bi, gehienak teorikoak, nahiz eta batzuek jarduera praktiko osagarriak izan. Ikastaroak Aldabe, El Campillo, Ibaiondo, Ariznabarra, Arriaga, El Pilar, Iparralde, Judimendi, Lakua, Salburua eta Zabalgana gizarte etxeetan emango dira.
Ikastaroetarako plazak zozketa bidez esleituko dira. Parte hartzeko, interesdunek Internet bidez, 010 telefonora deituz edo gizarte etxeetan edo kirol instalazioetan aurrez aurre izena eman behar dute. Izena emateko epea irailaren 5ean itxiko da, eta zozketa 6an egingo da. Hautatuek lau egun izango dituzte izena emateko. Irailaren 19tik aurrera, gainerako plazetan izena emateko beste epe bat irekiko da.
