Irakurketa denbora: 2 minutu
Irakurketa denbora: 2 minutuParisen otsailaren 10 eta 11n egin zen Adimen Artifizialari (AA) buruzko goi-bilerak agerian utzi ditu teknologia honen erregulazioaren inguruan Europaren eta Estatu Batuen arteko desberdintasunak. Europar Batasuna AA-ren garapen bermatzailearen eta erregulazio eta sarbide irekian oinarritutako ereduaren alde dagoen bitartean, Trump administrazioak ikuspegi hori baztertu eta azken akordiotik kanpo geratzea erabaki du. Bilerak EBren inbertsio handien iragarpenak ere markatu ditu.
Pariseko goi-bilera adierazpen bateratu batekin amaitu zen. Bertan, AAk etikoa, segurua eta giza eskubideetan oinarritua izan behar duela azpimarratu da. Ildo berean, desberdintasunak murriztearen eta garapen bidean dauden herrialdeei gaitasun teknologikoak hobetzen laguntzaren garrantzia ere nabarmendu da. Azken dokumentua 60 herrialdek babestu dute, horien artean Txina, Kanada, Japonia, Brasil eta Australiak, baita Europar Batasunak eta Afrikako Batasuneko Batzordeak ere, beste zenbait erakunderen artean.
Estatu Batuak argi eta garbi aldendu da adostasun horretatik. JD Vance presidenteordeak argudiatu du gehiegizko erregulazioak berrikuntza geldiarazi dezakeela eta Europako politikak zentsura-tresna bihur daitezkeela kritikatu du. Erresuma Batuak ere azken adierazpena sinatzeari uko egin dio.
Erregulazio-eztabaidaz gain, egun horietan Chat GPTren jabe den OpenAIk Elon Musken erosketa-eskaintza bat baztertu zuen, teknologiaren kontrolari eta merkatuaren kontzentrazioari buruzko eztabaida bizituz.
Europaren inbertsioa AAn
Goi-bilerako iragarpen nabarmenetako bat InvestAI ekimenaren abiaraztea izan da, EBn adimen artifizialaren garapena bultzatzeko 200.000 milioi euro mobilizatuko dituena. Planak 20.000 milioi euroko funts bat sortzea aurreikusten du, AAren lau gigafabrika finantzatzeko, zeinak azken belaunaldiko 100.000 txipekin hornituta egongo baitira. Instalazio horiek beharrezko konputazio-ahalmena eskainiko dute sektore estrategikoetan modelo aurreratuak garatzeko, hala nola osasungintzan, industrian eta mugikortasunean.
Proiektuak beste 30.000 milioi euro ere aurreikusten ditu inbertsio publikoan, Europar Batasuna AA-ren berrikuntza eta baliatzera bideratuta. Gainera, 50.000 milioi euro erakartzea espero da inbertsio pribatuan European AI Champions koalizioaren bidez, EBn teknologia horren garapenarekin konprometitutako enpresa teknologiko eta inbertitzaileen talde bat.
Argazkia: shutterstock.com
Advertisements
