Irakurketa denbora: Minutu 1
Zabalik da aurtengo Emantzipa laguntzak eskatzeko epea. EAEko gazteen emantzipazio prozesua erraztea helburu duen Eusko Jaurlaritzaren programa honek 6.173 gazteri eskaini zien laguntza pasa den urtean. Programak hilean 300 euroko dirulaguntza ematen die onuradunei bi urtez.
Estatistikek erakusten dutenez, EAEko 25 eta 29 urte bitarteko gazteen heren batek (% 32,8) bakarrik lortzen du gurasoen etxetik alde egitea. Errealitate horren aurrean, Emantzipa programak emantzipazioa bultzatu nahi du, bai alokairuaren bidez, bai etxebizitza erostearen bidez. Gaur egun, euskal gazteek, batez beste, 675 euro bideratu behar dituzte hilean alokairua ordaintzeko eta 549 euro hipotekaren kuota ordaintzeko.
Emantzipa deialdi berria
Bere irismena zabaltzeko, 2025eko deialdiak aldaketak sartzen ditu muga ekonomikoetan. Banakako diru-sarreren kasuan, urteko muga 28.000 eurotik 30.000 eurora igo da eta gutxienekoak 3.000 eurotan jarraituko du. Zergak batera ordaintzen dituzten bikoteen kasuan, diru-sarreren goiko muga 34.000 eurotik 36.500 eurora igo da. Laguntzak eskatzeko adin tartea 25 eta 29 urte artean mantentzen da.
Programak urtebete bete du eta oso balantze positiboa egin du. Horrela, jasotako 8.285 eskaeretatik 6.173k jaso dute laguntza. Lurralde historikoen arabera, laguntzen erdia baino gehiago Bizkaiari dagozkio (3.193). 2.074 laguntza eman dira Gipuzkoan eta 906 Araban. Eskatzaileen batez besteko adina 26,93 urtekoa da, eta gehienbat emakumeek eskatzen dute laguntza, guztizkoaren % 60arekin.
Datuek, gainera, agerian uzten dute onuradun gehienek (% 73) laguntza hauek etxebizitza alokatzeko erabiltzen dituztela. Etxebizitza jabegoan erosteko laguntza eskatzen duten gazteen kopurua, berriz % 27koa da.
2024ko ekitaldian, programak, guztira, 10.366.800 euro esleitu zituen, lurraldeka honela banatuta: 1.596.300 euro Arabarako, 5.308.800 euro Bizkairako eta 3.461.700 euro Gipuzkoarako.
Eusko Jaurlaritzak adierazi du, hasierako ordainketa atzerapen batzuen ondoren, 2025eko otsailean eta martxoan laguntzak puntualki ordaindu direla, aurreko hilabeteetan izandako atzerapenak zuzenduz.
Argazkia: Shutterstock
