Bilboko Udalak eta Bizkaiko Foru Aldundiak Bilboko Herri Kirol Zentroa proiektua aurkeztu dute. Zentro berria herri kirolen entrenamendurako Euskadin izango den lehen zentro profesionala izango da. Instalazioa Txurdinagako udal kiroldegian kokatuko da eta bere eraikuntza udaberri amaieran hasiko da.
Ekipamendu berriak guztira 2.286 metro karratuko azalera hartuko du, horietatik 846 pabiloi nagusiari dagozkiolarik. Gainerako espazioa hornidura-sareak eta alboko zolaketa ezartzeko erabiliko da. Proiektua gauzatzeko aurrekontua 1.367.621,50 eurokoa da. Aurrekontu horretatik Bilboko Udalak finantzatuko du kopururik handiena, Bizkaiko Foru Aldundiaren 229.675 euroko ekarpen gehigarriarekin.
Herri kirolak
Zentroak herri kiroleko hainbat modalitate aldi berean praktikatzeko aukera emango duen erabilera anitzeko pista argi bat izango du, hala nola harri jasotzea, sokatira, trontza, aizkora, lasto jasotzea, lasto botatzea, ingude jasotzea, txinga eramatea, zaku-proba, orga jokoak eta lokotx bilketa. Gainera, mugikortasun arazoak dituzten pertsonentzat egokitutako komun-aldagela bat, fisioterapia gela bat, harrera-bulego gunea eta aireztapen eta klimatizazio instalazioetarako gela teknikoak izango ditu.
Bilboko Herri Kirol Zentroaren kudeaketa Bilboko lehen Herri Kirolak kirol kluba den Txirrika Herri Kirol Klubaren esku egongo da. Zentro berriak adinaren araberako jarduera programazio bat garatuko du. Lehen blokea eskola-kirolari eskainiko zaio eta, bertan, hiriko zenbait ikastetxek parte hartuko dute. Gainera, ikastetxe horiek Bizkaiko Kirol Egokituaren Federazioaren laguntza jasoko dute jarduera inklusiboen programarako. Bigarren blokeak, berriz, kirol federatua izango du ardatz eta, kirol-teknikari kualifikatuen eskutik, herri kirolen diziplinetako berariazko entrenamenduak eskainiko ditu.
Bilboko Herri Kirol Zentroa herri kirolaren garapen eta profesionalizaziorako erreferentziazko zentro bihurtzeko helburuarekin jaiotzen da. Kirolarien prestakuntza eta Bizkaiko Herri Kirolak modalitate ezberdinak zentralizatzea bilatzen du, eta erreferentziazko puntu gisa balioko du tradizionalak diren diziplina horiei lotutako kirol komunitate osoarentzat.
Eskolaren azken helburua da harrobiarekin lan egitea eskola kiroleko programaren bidez, zentro honetan trebatutako kirolariek euskal herri kirolaren kategoria altuenetan lehiatu ahal izateko.
Argazkia: Bilbao.eus
Advertisements
