Abian da Europako Batzordeak eta Hezkuntza eta Kulturarako Europako Agentzia Exekutiboak (EACEA) antolatzen duten DiscoverEU programaren deialdi berria. Programa honek 18 urteko gazteei Europan zehar bidaiatzeko aukera eskaintzen die. Deialdi honetan, guztira, Europa doan zeharkatzeko 35.000 bidaia-bonu eskainiko dira. Izena emateko epea apirilaren 16an amaituko da eta https://youth.europa.eu/discovereu_es atariaren bidez egin daiteke.
DiscoverEU
Deialdi berria 2006ko uztailaren 1etik 2007ko ekainaren 30era bitartean jaiotakoei zuzenduta dago, hau da, 2024ko uztailaren 1etik 2025eko ekainaren 30era bitartean 18 urte beteko dituzten gazteentzat.
Parte hartzeko Europar Batasuneko 27 estatu kideetako bateko (bere eskualde ultraperiferikoak barne) edo EBri lotutako itsasoz haraindiko herrialde eta lurraldeetako herritar edo egoiliar legala izan behar da. Erasmus+ programarekin lotutako herrialdeetako gazteak ere parte har dezakete, hau da: Islandia, Liechtenstein, Ipar Mazedonia, Norvegia, Serbia eta Turkia.
Eskaera prozesua erraza da: nortasun agiri, pasaporte edo bizileku legal txartel zenbaki baliozkoa emanez online inprimaki bat betetzea nahikoa da.
Hautatuek gehienez 30 egunez bidaiatu ahal izango dute, nagusiki trenez, nahiz eta programak bestelako garraiobide-alternatibak kontuan hartzen dituen, hala nola ferryak, autobusak eta, salbuespenezko kasuetan, hegazkinak urrutiko eskualdeetan edo uharteetan bizi direnentzat. DiscoverEU-ren helburu nagusia Europar Batasunekiko kidetasun sentimendua sustatzea da, gazteei bere kultura-aniztasuna eta ondare historikoa ezagutzeko aukera emanez.
Bidaia bakarka edo bost kide arteko taldeetan egiteko aukera dago. Taldeka egitea aukeratzen bada, kide guztiek adin eta bizileku-baldintza berberak bete beharko dituzte. Pertsona bat arduradun gisa izendatuko da eta eskaera aurkeztuko du. Pertsona horrek kode bat jasoko du eta beste taldekideekin partekatu beharko du haiek erregistratu ahal izateko.
Bidaia-bonuaz gain, parte-hartzaileek DiscoverEU-ren bidaia aplikazioaren bidez aktibatu daitekeen Europako Gazte Txartela jasoko dute. Txartel honek, urtebetez baliozkoa, deskontuak eskaintzen ditu kultura bisitetan, ikasketa jardueretan, kiroletan, tokiko garraioan, ostatuan eta janarian.
Hautatutako gazteak automatikoki “DiscoverEU enbaxadore” bihurtzen dira eta sare sozialetan #DiscoverEU etiketa erabiliz beraien esperientziak partekatzera animatzen zaie. Beren ikastetxeetan edo tokiko komunitateetan hitzaldiak eskain ditzakete ere, beren esperientzia europarrean ikasitakoa transmititzeko.
Programak laguntza gehigarria eskaintzen die ere desgaitasuna edo osasun arazoak dituzten gazteei. Informazio hau atari ofizialeko ohiko galderen atalean kontsulta daiteke.
