Gasteizko Udal Liburutegien Sareak irakurzaletasuna sustatzea helburu duen jardueren programa berria aurkeztu du. Otsailetik maiatzera bitartean, guztira 77 ekimen egingo dira gizarte-etxeetako liburutegietan, adin eta gustu desberdinetakoak.
Jarduera-programa adin guztietako irakurleentzat diseinatu da. Adibidez, familientzat eta txikienentzat, 37 jarduera diseinatu dira euskaraz, gaztelaniaz eta elebitan. Besteak beste, ipuin kontalariak, tailerrak, magia, birziklatutako objektuekin egindako musika kontzertuak, poesia errezitaldiak eta animalien adopzioari buruzko sentsibilizazio hitzaldiak izango dira. Jarduera horiek funtsezko gaiak jorratu nahi dituzte, hala nola adiskidetasuna, aniztasuna, tolerantzia, artea, musika, zientzia eta berdintasuna.
Gazteak eta helduak
Gazteei eta helduei zuzendutako proposamenak, berriz, 40 izango dira. Horien artean, literatur topaketak, liburuen aurkezpenak, tailerrak eta gizarte-intereseko gaiei, osasunari eta ongizateari buruzko hitzaldiak daude.
Aipatzekoa da ‘Idazteaz beste’ literatur topaketa sorta, non euskal literaturari eta euskarazko literaturari eskainitako gune bat eskainiko den, hainbat literatur genero biltzen dituen ikuspegiarekin. Denboraldi honetan, Mikel Ayerbe Sudupe Literatura Konparatuan eta Literatur Ikasketetan doktoreak parte hartuko du martxorako eta maiatzerako programatutako bi ekitalditan.
Gainera, Garbiñe Larrearen ‘Sendabelarrak’ liburua aurkeztuko da, istorioak, bidaiak eta zientzia ingurumenaren aldeko erabakiekin uztartzen dituen lana.
Tailerrek eta hitzaldiek gizartearen eta generoaren intereseko gaiak jorratuko dituzte, hala nola gose emozionala, estresa eta antsietatea, kristalezko sabaiak musikan eta emakumeek zientzian duten parte-hartzea. Maskotei eta haien elikadurari buruz eztabaidatzeko tartea ere gordeko da.
Maiatzean, Liburutegien Sareak Poetak Maiatzean Jaialdian parte hartuko du, Hunkitu Arte Elkarteak 2012tik antolatuta, irakurzaletasuna, idazketa eta poesiarekiko maitasuna sustatzeko eta gizarte-egituraren artean ilusioa piztuko duen lotura sortzeko helburuarekin..
Ekimen horiek guztiak apirilaren 15etik 23ra bitartean garatuko den 2024 Liburuaren Egunerako programa bereziarekin bat egingo dute.
