Egilea: Patricia Hernández / GKE Alboan
Argazkia: Alboan
Hitz kopurua: 519
Irakurketa denbora: 3 Minutu
Alboan GKEak European Solidarity Corps ekimenean parte hartzen du. Ekimen hori Europar Batasunaren ekimena da, eta nazioarteko boluntariotza humanitariorako aukerak eskaintzen dizkie Europako 18 eta 35 urte bitarteko eta EBko herrialdeetan iraupen luzeko bizilekua duten gazteei.
Zergatik egin nazioarteko boluntariotza?
Ekimen honen helburua da Europako gazteak animatzea Latinoamerikako hainbat herrialdetan iraupen luzeko nazioarteko boluntario-programetan parte hartzera. Esperientzia honek gizarteari laguntzeko aukera eskaintzen du, Latinoamerikako hainbat herrialdetan komunitateen bizi-baldintza urratuak hobetzera bideratutako boluntario-jardueren bidez.
Boluntario-lanetan, Alboanek hautaketa-, prestakuntza- eta laguntza-prozesuan lagunduko die parte-hartzaileei. Proiektuak laguntza humanitarioaren printzipioei jarraituz gauzatuko dira, hala nola: gizatasuna, neutraltasuna, inpartzialtasuna eta independentzia, baita “kalterik ez eragiteko” printzipioari jarraituz ere.
Proiektuak bat egiten du Alboanen lana eta izateko arrazoia definitzen duten kausetan oso presente dauden gai global garrantzitsuekin, hala nola giza eskubideak, migrazioa eta babesa, hezkuntza unibertsala, ekonomia sozial eta solidarioa edo ingurumenaren zaintza. Helburua da Europa solidarioago eta inklusiboago bat eraikitzen laguntzea, parte-hartzaileek hiritartasun kritikoa izan dezaten eta, aldi berean, beren etorkizun profesionalerako gaitasunak gara ditzaten bultzatuz.
Nori zuzenduta dago European Solidarity Corps programa?
European Solidarity Corps 18 eta 35 urte bitarteko gazteei zuzenduta dago, baldin eta:
- Legez EBn edo Programari atxikitako hirugarren herrialde batean bizi badira (Islandia, Liechtenstein, Turkia eta Ipar Mazedoniako Errepublika)
- European Solidarity Corps programaren atarian erregistratu badira.
- •uropean Solidarity Corps delakoaren beste programa batean lehenago parte hartu ez badute.
Ez dio axola zure profil profesionalak: zure motibazioa eta konpromisoa dira garrantzitsuena.
Zer estaltzen du programak?
- Oinarrizko gastuak, hala nola herrialderako joan-etorria, bisa-gastuak, txertoak, ostatua eta mantenua, eta gastu pertsonaletarako esleipen bat.
- Bidaia-asegurua.
- Bestelako laguntza-zerbitzuak, hala nola prestakuntza eta hizkuntza-laguntza.
- Harrera- eta bidalketa-erakundeak boluntariotza osoan laguntzea.
Zer egin behar da parte hartzeko?
Parte hartzeko, interesdunak Europako Elkartasun Kidegoaren atarian eman behar du izena, eta Europar Batasuneko Akademian doako prestakuntza osatu. Honako hauek dira egin beharreko urratsak:
1. Erregistra zaitez: EBko Europako Elkartasun Kidegoaren atarian, Laguntza Humanitarioko boluntariotzan parte hartzeko duzun interesa profilean adieraziz: bit.ly/AlboanVEUS
2. Jaso Laguntza Humanitarioko prestakuntza.
3. Bete autoebaluazioa. Behar duzun prestakuntza jaso ondoren, Alboanek EBren Atarian dituen lanpostu hutsak ikusi ahal izango dituzu.
4. Presta zaitez online. Derrigorrezko online prestakuntza (doakoa) 25 ordukoa da. Ziurtatu “Laguntza humanitarioko prestakuntza” aukera hautatzen duzula
5. Gainditu proba. Behin prestakuntza bukatuta, proba bat gainditu beharko duzu online prestakuntzan ikasitakoarekin.
6. Jaso aurrez aurreko prestakuntza. Proba gainditzen duten pertsonak Europar Batasunak antolatutako aurrez aurreko prestakuntzan (doakoa) parte hartzeko hautatuko dira.
7. Presta zaitez aurrez aurre. EBrekin aurrez aurreko prestakuntza 5 egunekoa da, eta online prestakuntzan lortutako ezagutza teorikoak eta boluntariotzarekin lotutako gai praktiko berriak aplikatuko dituzu.
8. Dagoeneko prest zaude hautatua izateko. Behar duzun prestakuntza jaso ondoren, Europar Batasunaren Atarian Alboanek dituen lanpostu hutsak ikusi ahal izango dituzu.
9. Ikusi lanpostu hutsak. Alboanen lanpostu hutsak betetzeko eskaera bat bidaltzen baduzu, online elkarrizketa izango duzu gurekin.
10. Presta zaitez Alboanekin. Hautatzen bazaitugu, aurrez aurreko eta online prestakuntza (doakoa) eskainiko dizugu, hobeto ezagut gaitzazun.
11. Hasi boluntariotza. Alboaneko prestakuntza egin ondoren, Guatemalarako bidaia egiten hasi ahalko zara.
Animatuko al zara?
Hazten lagunduko dizun eta mundu justuago bati ekarpena egiteko aukera emango dizun esperientzia baten bila bazabiltza, hauxe izan daiteke zure aukera.
