Irakurketa denbora: 2 minutu
Azkuna Zentroak Gutun Zuria Bilbao jaialdiaren 18. edizioa hartuko du otsailaren 25etik martxoaren 1era. Aurtengo edizioak euskal literaturaren izen ospetsuak eta nazioarteko egileak bilduko ditu hitzaren eta sormenaren inguruan.
Jaialdiaren parte-hartzaileen artean euskal sortzaile garrantzitsuak aurkituko ditugu, hala nola Joseba Sarrionandia, Oihane Amantegi Uriarte, Maddi Barber, Miren Amuriza, Lizar Begoña eta Itxaro Borda. Antolatzaileen arabera, “Gutun Zuria mugarik gabeko lurralde bat da, non hitzak eta topaketak ardatz nagusiak diren”.
Solasaldiak
Programaren barruan nabarmentzekoa da Sarrionandia eta Amantegi Uriarteren arteko solasaldia, “Euskaraz tropikoetan” izenburupean. Bertan, euskaraz idaztearen erronkaz eta literaturak gaur egun duen lekuaz hausnartuko dute.
Euskal literaturaren berrikuntzaren erreferente den Itxaro Bordak hizkuntza gutxituetan idaztearen erronka aztertuko du Aurélia Lassaque idazle okzitaniarrarekin batera. Bi idazleek literaturaren periferian lan egitearen esanahiaz mintzatuko dira.
Euskal literatura berriaren bi adibide nabarmen diren Miren Amuriza eta Lizar Begoñak, hizkuntzaren erabilera bereziaz, harreman afektiboen modu berriez eta mundu prekarizatu baten hondarrez hitz egingo dute programatutako hirugarren solasaldian.
Literatura topaketa baino zerbait gehiago
Gutun Zuria ez da bakarrik literatura topaketa bat; arte eta pentsamenduaren sorkuntzaren bidez munduari begirada baikorra eta irekia proposatzen duen jaialdia ere bada. Izan ere, gizarte gisa bizi dugun krisiaren aurrean, sorkuntza literarioaren bidez etorkizunari beste begirada batekin aurre egitea proposatzen dute antolatzaileek.
Ildo horretan, literatura garaikideko hainbat izen handik parte hartuko dute aurtengo edizioan, hala nola Leila Guerriero, Rodrigo Fresán, Sabina Urraca, Rosario Villajos, Carmen Estrada eta María Ángeles Fernández.
BBK Gutun Zuria Bilbao Sariak
Jaialdiaren barruan, BBK Gutun Zuria Bilbao Sariak emango dira. Aurten, Itxaro Borda idazle euskaldunak eta Leila Guerriero kazetari argentinarrak jasoko dute ohorezko makila. Biak izango dira protagonista: Guerrierok inauguratuko du jaialdia otsailaren 25ean, eta Bordak itxiko du martxoaren 1ean.
Sari hauek 2022az geroztik ematen dira, euskal eta nazioarteko literaturan funtsezko eragile direnen lan sortzailea aitortzeko. Aurretik saritutakoen artean daude Miren Agur Meabe, Theodor Kallifatides, Anjel Lertxundi, Cristina Rivera Garza, Mariasun Landa eta Juan Mayorga.
Gutun Zuria Pro profesionalei zuzendutako jardunaldiak ere izango dira, non liburuaren sektorearen erronkak aztertuko diren. Editatzea eta argitaratzea izango dira aurtengo gaiak, eta parte-hartzaileen artean egongo dira Pepitas de Calabaza, Periférica eta Astiberri argitaletxeak, Katixa Agirre, Rosario Villajos eta Leila Guerriero idazleak, eta ilustrazio munduko profesionalak.
Gazteentzako, Miren Billelabeitiak “Oroimen irakurria idatziz: aitita-amamen guda zibila” tailerra eskainiko du, DBHko 3. mailatik Batxilergoko 2. mailara arteko ikasleentzat. Tailer horrek irakurketaren garrantzia sustatu nahi du iritzi libre eta autonomoak garatzeko bide gisa.
Jaialdirako sarrerak gutunzuria.azkunazentroa.eus webgunean daude salgai.
Argazkia: Azkuna zentroa
Advertisements
