VillaSoundBilbao Jaialdiaren hirugarren edizioko epaimahaiak Ithaka talde gipuzkoarra aukeratu du VSB TOUR bira egiteko. Bira musikalak lau kontzertu eskainiko ditu Gernikan, Toledon, Zaragozan eta Kordoban.
Bira horretan, Ithakako lagunek talde ezagunekin partekatuko ahal izango dute eszenatokia (Belako, El Txef A eta Apartamentos Acapulco, besteak beste). Izan ere, Bilboko Udalak 2020ko urrian sortutako VSB TOUR egitasmoaren xedea da aukeratua den taldearen proiekzioa bultzatzea, eta, aldi berean, beste herri batzuetako talde emergenteekin elkarreragina eta sinergiak sustatzea.
Aurreko edizioetan bezala, aurten ere VillaSoundBilbao Jaialdia hiru fasetan garatu da. Lehenengoan, VillaSoundBilbao FEST, Bilborock Aretoan kontzertuak egin zituzten hasiera batean hautatutako 12 bandek. Bigarren faseak, VillaSoundBilbao MENTORING izenekoak, 12 talde horietatik 6 aukeratzea ahalbidetu zuen, Ithaka barne, prestakuntza eta aholkularitza profesionala jaso zutenak. Azken etapak, VSB TOUR birak, amaiera emango dio jaialdiaren hirugarren edizioari.
VSB TOUR 2023 birako kontzertuen datak eta lekuak itxita daude:
- Azaroaren 3a, ostirala – Toledo / Círculo del arte: Belako + Ithaka
- Azaroaren 25a, larunbata – Zaragoza / Sala Z: Apartamentos Acapulco + Ithaka
- Abenduaren 10a, igandea – Kordoba / Sala Hangar: Belako + Ithaka
- Abenduaren 29a, ostirala – Gernika (Astra): Ithaka + El Txef A
Ithaka
Ithaka Orio eta Zarauztik dator. Josune Freirek (bateria), Eneko Eizagirrek (baxua), Arantza Igartuak (gitarra) eta Leire Olariagak (ahotsa eta teklatua) osatutako taldeak lorpen nabarmenak lortu ditu, hala nola Gaztea Maketa Lehiaketako publikoaren saria 2022an, eta aurten Katapulta Tour Gipuzkoa zirkuiturako hautatuak izan dira.
Ithakaren proposamen musikala soinu ilun eta malenkoniatsuen itsaso batean murgiltzen da, alt-rocka, stonerra, post-punka eta post-rocka barne hartzen dituzten generoak arakatuz. Muse, Joy Division, Belako, Lukiek eta Wolf Alice bezalako taldeek eragina izan dute beren lehen diskoan. Bere musikak bateria sendoak, baxuaren riff melodikoak, gitarra atmosferikoak eta batzuetan gogorragoak, teklatu kementsuak eta ahots malenkoniatsuak ditu ezaugarri. Ithakaren letrek itxaropenik gabeko gizartea jorratzen dute, eta pandemiaren osteko mundu batean nortasuna eta arazo sozialak bilatzeari buruz hausnartzen dute. Bere musikan, norabiderik gabeko belaunaldi baten oihuak eta doinuak islatzen dira.
