Nafarroako Gobernuak eta Eusko Ikaskuntzak euskara kultura- eta kulturarteko bizikidetza-balio gisa sustatzeko eta ikertzeko hitzarmena berritu dute. 60.000 euroko zuzkidura duen akordioak “Elkarbizitzarako zubiak eraikitzen Nafarroan” programaren bigarren fasea finantzatuko du.
Hitzarmenak Nafarroako Foru Komunitatean euskararen transmisioa eta etorkizuna lantzen ditu, demografia berriei eta kulturarteko bizikidetzari arreta berezia eskainiz. Akordioa Nafarroako Gobernuko lehendakariorde eta Memoria eta Bizikidetza, Kanpo Ekintza eta Euskarako kontseilari Ana Ollok eta Eusko Ikaskuntzako lehendakari Ana Urkizak sinatu dute. Ekitaldian izan da, halaber, Euskarabideko zuzendari kudeatzaile Javier Arakama.
Euskara biztanle migratuarengana hurbiltzea
Programaren helburua da Nafarroara iritsi berri diren pertsonak euskarara zein Nafarroako kulturara oztoporik gabe hurbiltzea. Horretarako, talde horren beharretara egokitutako ikaskuntza- eta parte-hartze-aukerak sortuko dira. Oinarrizko helburua jatorri zein ibilbideen aniztasuna kontuan hartuko duen integrazio-eredu bat eraikitzea da.
Programaren helburua da biztanleria migratuaren artean euskararekiko eta Nafarroako kulturarekiko ikuspegi irekia sustatzea.
2025ean, Eusko Ikaskuntzak biztanleria migratuari galdetu zion nola bizi dituen euskara eta euskal-nafar kultura, eta zer oztopo aurkitzen dituen gizarteratzeko bidean. 2026ko faseak urrats bat gehiago egingo du, eta Nafarroako bertako herritarrei ere egingo die inkesta, bi taldeen pertzepzioak alderatzeko.
Kulturarteko bizikidetza
Bi inkestetan kulturarteko bizikidetzaz, kultur parte-hartzeaz eta gizarteratzea zailtzen duten oztopoez galdetuko da. Emaitzak generoari, jatorrizko herrialdeari edo Nafarroan emandako bizileku-denborari buruzko datuekin gurutzatuko dira.
Informazio horrekin, Eusko Ikaskuntzak txosten bat prestatuko du Nafarroako Gobernuarentzat, udalentzat eta gizarte-erakundeentzat proposamen zehatzak biltzeko. Erakundeak 1918tik ikertzen ditu euskal-nafar kultura eta gizartea, urte hartan Nafarroako, Arabako, Bizkaiko eta Gipuzkoako aldundiek sortu zituztenetik.
