Irakurketa denbora: 2 Minutu
Nafarroako Gazteriaren Institutuak (NGI) Gazteen Sariak golardoen XVIII edizioa jarri du martxan. 1998. urteaz geroztik, sariketa honek gazteriaren parte-hartzea, autonomia, berdintasuna eta bizi-kalitatea bultzatzeko proiektuak eta ibilbideak aitortu ditu. Aurtengo nobedade nagusia kategoria berri bat gehitu dela da: “GazteON Gunea” saria, gazteentzako erreferentziazko espazioak saritzeko helburuarekin.
Hautagaitzak apirilaren 30era aurkeztu ahal izango dira, bai banaka, bai taldeka, Nafarroan egoitza duen edozein pertsona, elkarte, talde informal, erakunde edo entitateren aldetik. Auto-aurkezpenak ere onartuko dira. Aurkezpen guztietan hautagaitzaren merituen memoria azaltzaile bat erantsi beharko da. Informazio guztia Nafarroako Gazteriaren Institutuaren webgunean eskuragarri dago.
Gaur egun arte, 114 pertsona, kolektibo eta entitate aintzatetsi dira gazteriaren arloko inplikazio eredugarriagatik. Aurten, esan bezala, sarien eremua zabaldu da, gazteen bizitza hobetzera bideratutako akonpainamendua, jarduerak, baliabideak eta ekimenak eskaintzen dituzten espazio fisikoak ere nabarmentzeko.
Lau modalitate
2025eko edizioak, lehen aldiz, “GazteON Gunea” saria emango du, Nafarroan kokatutako eta gazteen ongizatea, parte-hartzea eta inklusioa indartzeagatik nabarmentzen den espazio bat aitortzeko. Bereziki baloratuko dira kalitatezko zerbitzuak eskaintzen dituzten, aisialdi hezitzailea sustatzen duten, parte-hartze prozesuak bultzatzen dituzten eta beren komunitatean erreferente gisa jarduten duten espazioak.
Kategoria berri honekin batera, beste ohiko hiru sariak mantentzen dira:
- Gaztea Saria: 14 eta 30 urte bitarteko pertsonei zuzendua, elkartasuna, ahalegina, nazioarteko mugikortasuna, bizitza osasungarria edo komunitatean inplikazioa bezalako balio sozialak garatzeagatik nabarmentzen direnei ematen zaie. Bestelako gazteentzat inspirazio-iturri izatea baloratzen da.
- Parte-hartze soziala Saria: Gazteen inplikazio aktiboa Nafarroako bizitza sozial, politiko, kultural edo ekonomikoan sustatzen duten elkarte edo taldeei zuzendua, parte-hartze kolektibotik eraldaketa-espazioak sortzen dituztenei.
- Erakunde edo Entitate Saria: Nafarroan egoitza duten eta gazteen bizi-baldintzak hobetzen, autonomia, ongizatea eta garapenerako aukerak bultzatzen dituzten erakunde publiko zein pribatuei zuzendua.
Ebaluazio prozesua eta sari banaketa
Aurkezpen epea itxi ondoren, ebaluazio tekniko fase bat gauzatuko da. Baldintzak betetzen dituzten hautagaitzak batzorde aholkulari batek baloratuko ditu, hainbat irizpide kontuan hartuta: inpaktua, ibilbidea, berrikuntza edo Nafarroako gazteen errealitatearekiko lotura.
Kategoria bakoitzean puntuazio onena lortu duten hiru hautagaitzek online bozketa fase batean parte hartuko dute. Bertan, Nafarroako Gazte Txartelaren titular diren 14 eta 30 urte bitarteko gazteek bozkatu ahal izango dute. Azken puntuazioa herri-bozketa eta balorazio teknikoaren batura izango da.
Orain arte sariketa osatu duten hiru modalitateetan saritutako hautagaitzek 2.500 euroko sari ekonomikoa eta diploma egiaztagarria jasoko dituzte. “GazteON Gunea” sari berriaren kasuan, aitortza ohorezkoa izango da, espazio gazte nabarmendua dela egiaztatzen duen diploma baten bidez.
