Adimen artifizialak sortutako testuak detektatzen espezializatutako Pangram konpainiaren azterketa baten arabera, LinkedIn da eduki automatizatuz saturatuen dagoen sare soziala. Bost plataformatako milioi bat argitalpen baino gehiago aztertuta, ikerlanak hauteman du testu luzeen laurden bat AAk idatzia dela oso-osorik. LinkedInen kasuan, proportzio hori % 40ra igotzen da.
Pangramek erabiltzailearen feed-ean agertzen diren testuak aztertzen dituen Chromeko luzapen baten bidez bildu zituen datuak. Tresna instalatu zutenek beren analisien emaitzak modu anonimoan eta borondatez partekatu ahal izan zituzten; horri esker, bi hilabetetan LinkedIn, X, Medium, Reddit eta Substack plataformetan ikusitako 1.002.627 argitalpen biltzea lortu zen.
Testuen % 25 artifizialak dira
250 hitz baino gehiagoko testuen % 25,72 AAk osorik sortutakotzat sailkatu zen. Proportzio hori, ordea, asko aldatzen da plataformaren arabera. LinkedInen, argitalpen luzeen % 40 baino gehiago erabat automatizatutako edukia zela ikusi zen.
Ikerketak argitalpenak eta iruzkinak ere alderatzen ditu. LinkedInen, argitalpen independente batek erantzun batek baino 1,35 aldiz probabilitate handiagoa du AAk sortua izateko. Redditen, aldiz, kontrakoa gertatzen da: iruzkin gehien-gehienak gizakiek idatzitakoak dira (% 98,1); argitalpen nagusietan, berriz, eduki automatizatua % 11,6ra iristen da.
LinkedIneko argitalpen luzeen % 40 baino gehiago AAk sortuak dira
X da AAk sortutako edo haren laguntzaz idatzitako testuen proportzio konbinatu handiena duen plataforma; izan ere, argitalpenen ia erdiek automatizazio-mailaren bat erakutsi zuten. Substack da, berriz, eduki automatizatu gutxien duen plataforma, nahiz eta haren testuen bosten batek baino gehiagok ere AAren arrastoak izan.
LinkedInek neurriak iragarri ditu giza ekarpenik gabe masiboki sortutako edukien zabalkundea murrizteko; ordea, ez ditu argitalpen horiek automatikoki ezabatuko, haien ikusgarritasuna mugatuko du.
