Azken asteetan bolbora bezala ibili da Interneten, Suedian sexua kirol gisa katalogatuta egongo dela zioen albiste bat. Eta albiste horrekin lotuta, herrialde horretan lehen sexu txapelketa ‘ofiziala’ egingo dela ere agertu da. Horrelako albisteek oihartzun handia dute Interneti esker, baina, askotan gertatzen den bezala, ez dugu sarean irakurtzen dugun guztia sinetsi behar. Horrela, frogatuta geratu da Suediak sexua kirol gisa katalogatu zuela zioen albistea amen-omen bat dela. Eta txapelketari buruzko berria, argi eta garbi amen-omen bat dirudiena, egia omen da. Horrela, kontrakorik esaten ez den bitartean, ekainaren 8an hasiko da Goteborg hirian Europako Sexu Txapelketaren lehen edizioa.
Txapelketa
Iragarri denez, sei asteko iraupena izango duen txapelketak hamasei diziplina ezberdin izango ditu. Puntuak lortzeko, sedukzioa, gorputz-masajeak, erresistentzia-maila, posizio-aldaketetan sormena, orgasmo kopurua denbora jakin batean lortzea edo beste ezaugarri sexual batzuk hartuko dira kontuan. Puntuazioa 5 eta 10 arteko notak esleituko dituen epaimahai baten eta herri bozketa baten artean erabakiko da, eta parte-hartzaileek puntu gehigarriak lortu ahal izango dituzte Kamasutraren ezagutza teoriko handiak dituztela frogatzen badute.
Europako hogei herrialdetako gizon eta emakumeek hartuko dute parte, eta horien artean Espainiako ordezkari bat egongo da, Selva Lapiedra, sare sozialetan milaka jarraitzaile dituen eta OnlyFans plataforman helduentzako edukiak argitaratzen dituen brasildar jatorriko modelo eta aktorea. Orain arte konfirmatutako beste lehiakide batzuk Ann Joy (Finlandia), Sexy Lexy (Portugal), Monsieur Lorenzo Viota (Frantzia), Nek Sinner (Grezia), Matthew Meier (Ukraina), Barbie Sins (Britainia Handia), Mister Riddle (Errusia), Sweet Mery (Kroazia) eta Mugur (Errumania) dira.
