Egilea: Oier Zabalegi
  Argazkia: shutterstock.com
  Hitz kopurua: 381
  Irakurketa denbora: 2 Minutu

Hil honetan bertan Lanaren Nazioarteko Erakundeak (LANE) argitaratu duen ‘Gizarte eta Enplegu Joeren Txostena 2026’ azterlanaren arabera, Adimen Artifiziala bere lehen enplegua lortu nahi duten eta goi-mailako unibertsitate-prestakuntza duten gazte unibertsitarioen lan merkaturatzea oztopatzen ari da. 

LANEk ohartarazi duenez automatizazioak eragin handiagoa izango du goi-mailako ikasketak dituzten gazteen artean ikasketa-maila baxuagoa duten horien artean baino. Arrazoia garbia da: unibertsitate-tituludunek adimen artifizialak, osatu beharrean, funtzioak ordezkatzen dituen lanbideetan lan egin ohi dute. LANEren ustez, goi-mailako ikasketak dituzten gazteen enpleguen % 29,5 automatizazioaren arriskupean daude; ikasketa-maila baxuagoa duten horien kasuan, % 19,1.

Herrialde aurreratuak

Arrakala are handiagoa da herrialde aberatsetan, non gazte tituludunen heren batek baino gehiagok aurre egin beharko dion mehatxu horri. Herrialde txiroetan, lehen sektoreak pisu handiagoa duenez ekonomian, biztanleriak ikasketa-maila baxuagoak izan ohi ditu eta, hortaz, arriskua nabarmen txikiagoa da.

Herrialde aurreratuenetan, gazte kualifikatuen heren batek baino gehiago aurre egin beharko dio Adimen Artifizialaren mehatxuari

Stanford Unibertsitateak argitaratu duen azterlanaren arabera, adimen artifizialaren eragina, soldatetan baino, eskura izango diren lanpostuen kopuruan nabarituko da. Azterlanak azpimarratzen duenez, eragina sektore zehatz batzuetan antzeman ahal izango da, horietan adimen artifiziala lana osatu beharrean gizakiak ordezkatzeko gai izango delako. Txostenean azpimarratzen denez, fenomeno horrek gazteen lan-merkaturatzea atzeratu eta garapen profesionala oztopatuko du, bereziki, herrialderik aurreratuenetan.

PUBLIZITATEA

ELGAk 2024an egindako inkesta baten arabera, goi-mailako ikasketak dituzten gazteek kezka handiagoa adierazten dute adimen artifiziala dela-eta lanpostuak gal ditzaketelako.  LANEk berak AAk gazteen enpleguan duen eragin osoa oraindik zalantzazkoa dela onartzen badu ere, ohartarazi du arriskuak eta aukerak arretaz jarraitu beharko direla onura teknologikoak aprobetxatuko dituzten politika publikoak diseinatzeko.

Microsoft: AAk 40 lanbide arriskuan jartzen ditu

Pasa den urtean Microsoftek argitaratu zuen azterketa batek kezka piztu zuen lan-merkatuan. Adimen artifizial sortzaileak gehien mehatxatzen dituen 40 lanbideak identifikatu zituen erraldoi teknologikoak eta itzultzaileak, historialariak eta kazetariak aipatzen ziren arriskurik handiena zutenen artean.

Ikerketa Microsoft Bing Copilot zerbitzuarekin egindako 200.000 elkarrizketan oinarritu zen. Emaitzek erakusten dutenez, ahalegin intelektual teknikoa eskatzen duten lanbideak izango dira kaltetuenak, hala nola informatika, matematika edo bulegoko kudeaketa.

Txanponaren beste aldean, eskulan zuzena eskatzen duten ogibideek —makineria astuneko operadoreak, garbitzaileak edo osasun-langileak— ez dute adimen artifizialaren eragina hainbeste nabarituko.

Eztabaida oraindik zabalik dago: adituen artean ez dago adostasunik gazteek edo esperientzia handiko langileek arriskua handiagoa izango duten.