‘Zientzia-emakumeak argira’ erakusketa Eureka! Zientzia Museoan

 Irakurketa denbora: 2 minutu

Donostiako Eureka! Zientzia Museoak ‘Zientzia-emakumeak argira’ mikroerakusketa hartuko du uztailaren 31ra arte. Diziplina zientifiko ezberdinetan aztarna esanguratsua utzi duten hamabi emakumeren bizitza eta lana balioan jartzen duen erakusketa da, emakume horien ibilbide eta borrokak ikusaraziz eta zientzian genero-estereotipoak gainditzen lagunduz. Sarrera librea da eta museoaren ohiko ordutegian bisitatu daiteke.

Zientzia-emakumeak argira

Panel ezberdinen bidez, erakusketak garai eta espezialitate ezberdinetako hamabi emakume zientzialari aurkezten ditu:

• Amena Karimyan: astronomo eta aktibista afganarra bere herrialdeko emakume eta neskatoei astronomia irakastea helburu duen Kayhana elkarte astronomikoaren sortzailea da.
• Dorotea Barnés González: teknika espektroskopikoak kimikan aplikatzen aitzindaria, bere karrera Gerra Zibilak eta diktadura frankistak eten zuten.
• Halet Çanbel: arkeologo turkiar honek bere herrialdearen ondare kulturalaren kontserbazioan indusketa garrantzitsuak egin ditu. Lan zientifikoaz gain, 1936ko Olinpiar Jokoetan parte hartu zuen, kirol hitzordu honetan lehiatu zen lehen emakume musulmana bihurtuz.
• Harriet Martineau: soziologiaren amatzat hartua, XIX. mendean ekonomia eta gizarteari buruzko ideia berritzaileak garatu zituen.
• Jeane Baret: XVIII. mendean espedizio zientifiko batean parte hartzeko gizonez mozorrotu zen botanikari frantsesa mundu osoari bira eman zion lehen emakumea izateagatik da ezaguna.
• Lurdes Ansa: euskarazko material zientifikoen edizioaren arduraduna eta euskarazko dibulgazioaren sustatzailea.
• Margaret Crane: Meg Crane izenez ezagunagoa, estatubatuar biokimikari, diseinatzaile grafiko eta asmatzaile honek etxean egiteko lehen haurdunaldi-proba asmatu zuen 1967an.
• Mª Jesús Esteban Galarza: ikerketa aplikatuan espezializatutako matematikaria.
• Nawal El Saadawi: mediku eta idazle egiptoarra, eremu arabiarrean emakumeen eskubideen defentsagatik ezaguna.
• Patricia Rodríguez Brennan: ornodunen morfologia genitalaren koeboluzioa ikertzen duen biologia ebolutiboko kolonbiar aditua.
• Suzuko Ainhoa Tamura: hizkuntzalari japoniarrak paper garrantzitsua izan zuen euskara bere herrialdeko ikasketa akademikoetan sartzen.
• Uxue Lazkano Dobao: prostata minbiziaren prozesu metastasikoen ikerketan espezializatutako biologo konputazionala.

Ekimen hau Emakumeak Zientzian 2025 programaren parte da, 35 euskal erakundek parte hartzen duten proiektua, eta bere bederatzigarren edizioan, 60 jarduera baino gehiago eskaintzen ditu zientzian emakumeen papera nabarmentzeko. Aurtengo leloa, “Hazia erein”, eremu zientifikoan berdintasunerantz aurrera egiteko ekintza txiki bakoitzak lagundu dezakeela adierazten du.

Argazkia: kutxafundazioa.eus