Irakurketa denbora: 2 Minutu
Bilbo Zaharra arte garaikidearen topagune bilakatuko da apirilaren 3tik 13ra, BLV-ART jaialdiaren edizio berri batekin. Bilbo kulturaren alde eraberritzaile eta berritzaileenarekin lotzea du helburu Udalaren ekimen honek hogei proposamen inguru bilduko ditu antzerki fisikoaren, arte bizien, dantzaren eta ikus-entzunezko instalazioen esparruan.
Programazioaren aurkezpenean Bilboko Udalaren Kultura eta Gobernantza zinegotzi Gonzalo Olabarriak eta BLV-ARTeko zuzendari Alicia Otxandategik azaldu dutenez, jaialdiak belaunaldi berriko artista gazteak eta jada finkatuta dauden beste batzuk bilduko ditu. Prentsaurrekoan, gainera, Ane Zapirain artistak apirilaren 12an Berreginen Museoan aurkeztuko duen “Agortu” dantza piezaren laburpen bat eskaini du.
BLV-ART
BLV-ART jaialdia 2007an sortu zen “Bilbo Zaharra, kulturarako zubia” izenarekin, Udalaren kultura-estrategiaren barruan, auzoaren balioa nabarmendu eta hiribilduarekin kultura bidez lotzeko helburuarekin. Ekimen hau Bilboko 2023-2033 Kultura Plan Estrategikoaren ildo nagusiekin bat dator, hiriko kultura-eskaintza deszentralizatzea sustatzen baitu.
Programazio anitza eta berritzailea
Berreginen Museoa, Bilborock, Kremlin Aretoa eta San Frantziskoko Udaltegia izango dira hamasei emanaldien egoitzak. Programatutako lan gehienak lehen aldiz aurkeztuko dira Bilbon, eta hiru estreinaldi absolutu ere izango dira, gehi Euskadi mailako betse estreinaldi bat.
Estreinaldien artean nabarmentzekoak dira:
- “Itzalekin dantzan” (Komorebi produkzioak), apirilaren 3an Bilborocken
- “TORCIDXS” (Las Nenas Theatre), apirilaren 5ean Berreginen Museoan eta 6an Bilborocken
- “Pelikula bat balitz” (Macarena Recuerda Sheperd), apirilaren 13an Bilborocken
Euskadin estreinatuko den lana, berriz, Galiziako Butacazero konpainiaren “Lo único que verdaderamente quise toda la vida es ser delgada” da, apirilaren 10ean San Frantziskoko Udaltegian antzeztuko dena.
Euskarazko programazioa
Jaialdiak euskarazko hainbat proposamen ere eskainiko ditu, hala nola:
- “Heroiaren mina” (Gaizka Chamizo), antzerki-zirkuko pieza bat, apirilaren 4an Berreginen Museoan
- “Artxibo biluzia” (Metrokoadroka), hitzaldi performatiboa, apirilaren 12an Bilborocken
- “Pelikula bat balitz” (Macarena Recuerda Sheperd), apirilaren 13an Bilborocken
Programazioan parte hartuko duten artisten artean daude Macarena Recuerda, Metrokoadroka, Altraste Danza, Eva Guerrero eta Proyecto Larrua. Proposamen gehienak Euskal Herritik datoz, baina baita Galiziatik ere.
Adibide moduan, jaialdiaren lehen egunean, apirilaren 3an, Berreginen Museoan Proyecto Larruaren “Sangre y Klorofila” dantza-pieza izango da ikusgai, Vicente Ameztoy margolariaren obran oinarritua. Jarraian, “Entre cuerpos” aurkeztuko du Eva Guerreroren konpainiak. Egun berean, Bilborocken, dantza eta proiekzio analogikoak uztartzen “Itzalekin dantzan” ikuskizuna eskainiko da,.
Jarduera guztiak doakoak izango dira lekua bete arte, Bilborock aretoko emanaldiek izan ezik, bost euroko prezioa izango baitute. Urteen zehar, jaialdia Bilbo Zaharreko erakusleiho kultural nagusietako bat bilakatu da, eta kultura-eszena berrienetara hurbiltzeko aukeratzat aurkezten da, formatu berritzaileak eta esperimentalak biltzen dituen ekimen baten bidez.
