Abian da Arabako arte bisualetako talentu gazteei zuzendutako Gazte Arte lehiaketaren aurtengo deialdia. Lehiaketak aukera ematen die 14 eta 25 urte bitarteko gazteei beren sormena hainbat diziplina artistikotan aztertzeko eta erakusteko: pintura, eskultura, instalazioak, performance-a, happening-a, esku-hartze artistikoak, kaleko artea, teknika mistoak, bideo-instalazioa, ilustrazioa, ehungintzako artea…
Proiektuen gaia erabat librea da, betiere publikoari irekitako tailer batean sor badaitezke. Ateratzen diren obrek erakusketa kolektibo batean parte hartzeko aukera izango dute.
Lehiaketa hiru fasetan banatzen da:
- Lehenengo fasea: Lehiaketa. Parte hartzaileek 2023ko urriaren 25era arte izango dute beren proposamen artistikoak aurkezteko. Epaimahaiak lanak ebaluatuko ditu eta lau irabazle hautatuko ditu, bi kategoriatan banatuta: 14-19 urte eta 20-25 urte.
- Bigarren fasea: Zuzeneko sorkuntza tailerrak. Lau irabazleek zuzeneko sorkuntza-tailerretan parte hartzeko aukera paregabea izango dute. Bertan, Gasteizko artista adituen eta Gazte Arteren aurreko edizioetan saritutako gazteen babespean lan egingo dute. Tailer horiek Montehermoso Kulturuneko ur-biltegian egingo dira 2024ko urtarrilaren 2tik 7ra.
- Hirugarren fasea: Erakusketa. Zuzeneko sorkuntza-tailerretan sortutako lanak erakusketa kolektibo batean erakutsiko dira LABE Gazte Laborategian, 2024ko otsailaren 2tik martxoaren 3ra.
Tailer hauetan eta erakusketa kolektiboan parte hartzeko esperientziaz gain, irabazle bakoitzak 300 euroko saria jasoko du. Katalogo bat ere argitaratuko da, parte-hartzaileen ibilbidea dokumentatzeko eta sortutako obrei buruzko informazioa emateko. Lan artistikoak modu birtualean eskuratu ahal izango dira Gasteizko Udalaren webgunean.
Lehiaketari edo bere oinarriei buruzko edozein kontsulta egiteko, interesa dutenek gaztearte@gmail.com helbide elektronikoaren, 689 15 84 10 telefonoaren edo Instagram @sortzen_vg kontuaren bidez jar daitezke harremanetan.
