Bilboko Herri Kirol Zentroak, herri kirolen profesionalizazioari eta hedapenari eskainitako Euskadiko lehen zentroak, BaiForce Training proiektuarekin ekingo dio bere lehen denboraldi osoko programazioari.
Diziplina horrek crossfit eta herri kirolak uztartzen ditu indarra, erresistentzia, egonkortasuna eta koordinazioa lantzeko; helburua ez da soilik kirolari espezializatuak prestatzea, baizik eta pertsona aktiboak, autonomoak eta osasuntsuak heztea.
Zentroa Bilboko Txirrika Herri Kirol Klubak kudeatzen du, eta joan den maiatzean inauguratu zuten.
15 urtetik aurrera
Zentroak herri kiroletan oinarritutako entrenamendu-programa eskaintzen du, erabiltzaile bakoitzaren ezaugarrietara egokituta, 15 urtetik gorako edozein adinetarako eta edozein egoera fisikotarako egokia.
Saio guztiak modalitate bakoitzean adituak diren profesionalek gainbegiratzen dituzte, teknika findua eta egoera fisiko egokia lortzeko helburuarekin, kultura eta tradizioa ere arnasten diren espazio batean.
Zentroak herri kiroletan oinarritutako entrenamendu-programa eskaintzen du, erabiltzaile bakoitzaren ezaugarrietara egokituta, 15 urtetik gorako edozein adinetarako eta edozein egoera fisikotarako egokia
Denboraldi berriaren hasierarekin batera, klubak BaiForce Training-eko doako saio bat eskainiko die Bilbao Kirolak-eko udal-kiroldegietako Fitness aretoetan izena emanda dauden pertsonei, bai eta Aqua+Fitness nahiz Premium abonatuei ere. Parte hartu nahi dutenek mezu elektroniko bat bidali beharko dute izen-abizenak, jaioteguna eta bertaratu nahi duten eguna eta ordua adierazita.
Bilboko Herri Kirol Zentroaren erabilera anitzeko pistak hainbat diziplina aldi berean praktikatzeko aukera ematen du, hala nola harrijasotzea, aizkora, sokatira, trontza, txinga eramatea, orga jokoa edo lokotx biltzea, besteak beste.
