Otsailaren 12an amaituko da Iruñeko Udalak 2024/25 ediziorako prestatu dituen tailer-eskoletako hautaketa-prozesuan izena emateko epea. Udalak zenbait tailerretarako eskainitako 102 plazak betetzeko epea luzatu du. Zehazki, honako tailer hauek osatzeko daude: Igeltserotza Eraikuntzan, Hargintza eta Biltegiaren Kudeaketa, Zuraren Arotzeria eta Eraikinen Mantentze eta Muntaketa.
Enplegagarritasuna
Lehen egunetik prestakuntza teoriko eta praktiko ordaindua emateko programa honen helburua da gazteei lanbide espezifikoetan trebatzeko eta enplegagarritasun-profila hobetzeko aukerak eskaintzea. Eskola bakoitzeko 17 plazak hautaketa-prozesu baten bidez banatuko dira, eta plazarik lortzen ez dutenak itxaron-zerrendan geratuko dira.
Programak iraungo duen 20 hilabeteetan, parte-hartzaileek prestakuntza teorikoa eta praktikoa jasoko dute. Azken hori ‘Gizarte Ekintza’ delakoaren bidez egingo da, eta bertan, ikasleek beren ezagutzak aplikatuko dituzte komunitatearentzat onuragarriak diren proiektuetan.
Prestakuntza 2024ko martxoaren 1ean hasi eta 2025eko urriaren 31ra arte luzatuko da. Prestakuntza amaitzean, ikasleek profesionaltasun-ziurtagiri ofizial bat jasoko dute, prestakuntzan parte hartu dutela ziurtatzeko eta enplegagarritasun-profila osatzeko.
Ordainsariari dagokionez, lehenengo bi hilabeteetan 9 euroko beka emango da bertaratutako egun bakoitzeko. Ondoren, ikasleek 819 euro gordin jasoko dituzte hilean lehenengo urtean, eta 945 euro gordin hilean bigarren urtean, kontratu-urte bakoitzeko bi aparteko ordainsariren zati proportzionala barne, prestakuntza-kontratu baten bidez.
Hautaketa prozesuan parte hartzeko izen-emateak online egin daitezke Nafarroako Gobernuaren enplegu webgunearen bidez edo aurrez aurre hitzordua eskatuz empleocitaprevia.navarra.es estekaren bidez. Iruñeko Udaleko Tailer Eskolek Nafarroako Gobernuaren finantzaketa dute, Nafar Lansareren bitartez.
