2026-2027 ikasturterako euskaltegietako matrikulazio-prozesua abian da dagoeneko, berrikuntza garrantzitsu batekin. Euskara Bonuak B1 mailara arte euskara ikastea ahalbidetzen du, 120 euroko ordainketa bakar baten bidez eta gehienez lau urteko epean. Ordainketa-sistema berri honek orain arteko laguntza mailakatuak ordezkatuko ditu, ikasleek maila bakoitzean egin beharreko izapideak nabarmen murriztuz.
Dagoeneko A1 edo A2 mailak ikasten ari diren pertsonak automatikoki igaroko dira eredu berrira, eta ez dute 120 euroak ordaindu beharko.
120 euro B1 mailara iristeko
Kanpainaren aurkezpenak Eusko Jaurlaritzako, HABEko, hiru foru-aldundietako, hiriburuetako udaletako, EUDELeko eta 106 euskaltegien sareko berrogeita hamar ordezkari inguru bildu ditu Gasteizen. Ibone Bengoetxea lehendakariorde eta Kultura eta Hizkuntza Politikako sailburuak adierazi duenez, “euskara ikasteko politiken helburuak prestakuntzarako sarbidea errazteaz harago joan behar du”.
Euskara Bonuak B1 mailara arte euskara ikastea ahalbidetzen du, 120 euroko ordainketa bakar baten bidez eta gehienez lau urteko epean
Kanpainak umorea baliatzen du inoiz euskaraz hitz egin ez dutenak ikastera animatzeko, besteak beste, “kaixo batek ate asko ireki ditzake” bezalako mezuekin. Euskara Bonuarekin batera, HABEk beste bide batzuk ere mantentzen ditu profil desberdinetara egokitzeko; hala nola, AISA programa, Euskadira iritsi berrientzat; INGURA, online ikasteko; eta 16-18 urte bitarteko gazteentzat C1 maila lortzera zuzendutako berariazko laguntzak.
25 milioi euro 2022tik aurrera
2022 eta 2026 artean, Eusko Jaurlaritzak 25,1 milioi euro bideratu ditu euskara ikasteko laguntzetara, eta 43.500 pertsonak jaso dituzte orain arte. Azken hiru urteetan, 100.000 pertsona baino gehiago igaro dira Euskadiko euskaltegietatik.
