Irakurketa denbora: Minutu 1
Gasteizko El Pilar auzoak ‘Graffesta 01012’ topaketaren lehen edizioa hartuko du datorren ekainaren 28an. Egun osoan zehar musika, tailerrak eta beste hainbat jarduera biltzen duen programazioa izango da. Gainera, 11 grafiti-egilek zuzenean sortuko dituzte beren lanak Pío Baroja Zentroaren instalazioetan. Zehazki, Gasteizko 6 egile (DIBU, Graphysics, OJODEKUERVO, 01Colors, FillOne eta W )izango dira El Pilarren. Horiekin batera, Hego Euskal Herritik etorritako hiru egile (Peio Iglesias iruindarra, Manu Cruz bilbotarra eta Miguel Carrera donostiarra) eta Estatuko beste hiru ere bertan izango dira: ITSPERFECTCHAOS (Huelva), Carolina Adán Caro (Palma Mallorcakoa), Nemo Ika (Madril).
Topaketa Gasteiz Hobetuz ekimenaren barruan hautatutako herri-proposamena da eta 1.000, 700 eta 300 euroko sariak banatuko ditu hiru lan onenen artean.
Parte-hartzaileek zentroaren hormetan lan egingo dute horretarako gaitutako espazio batean eta, horri esker, publikoak sormen-prozesua denbora errealean jarraitzeko aukera izango du. Hiri-artean aditua den epaimahaiak amaitutako lanak ebaluatuko ditu irabazleak erabakitzeko.
Askotariko programazioa
Egitaraua 9:00etan hasiko da lehiaketa nagusiaren irekierarekin. 11:00etatik aurrera, Ángela Lozanok zuzendutako horma-irudi kolaboratibo bat egingo da El Pilarko BIZANeko erabiltzaileen parte-hartzearekin. Jarduera hori 20:00etara arte luzatuko da, 14:30 eta 16:30 arteko atsedenaldiarekin.
Tailerren egitarauaren barruan 12:30etan hasiko den lettering saioa eta 16:30etatik aurrera La Omegarekin egingo den grafitia azpimarratu behar dira. Ildo berean, grafitiak libreki margozteko gune ezberdinak izango dira.
Topaketa hiru DJak girotuko dute: DJ Santa Klaux (13:00etatik 14:00etara), DJ SU (16:30etik 18:15era) eta DJ XBEATS90 (18:15etatik 20:00etara).
