Irakurketa denbora: 2 Minutu
Udaberriarekin batera bueltan da Aranzadi Zientzia Elkarteak antolatu ohi duen #sugebizi kanpaina. Egitasmo honen xede nagusia da animalia horien inguruko mito faltsuak baztertzea eta narrasti horiekiko errespetua sustatzea. Horretarako, kanpainak gure ingurunetan bizi diren sugeen argazkiak ateratzera eta horiek #sugebizi trailarekin partekatzera gonbidatzen gaitu. Sare sozialetan garatzen den jarduera horrez gain, kanpaina tradizionalki narrasti hauen inguruan den pertzepzio negatiboa eraldatzea helburu duten hitzaldi eta tailerrekin osatzen da.
Euskal Herriko sugeak
Aranzadiko Herpetologiako zuzendari Ion Garinek azaltzen duenez, ”Bizidun iheskorrak izan arren, Euskal Herrian 8 suge eta 3 sugegorri espezierekin topo egin dezakegu. Nahiz eta espezie horietako batzuk babestuta egon Nafarroa zein Euskal Autonomia Erkidegoko Espezie Mehatxatuen Zerrendan, euren inguruko ezagutza oso mugatua da eta herritarren parte hartzearen bidez bizidun horien inguruko informazioa lortu nahiko genuke, betiere jarraibide batzuk aintzat hartuz”.
Uztailera arte luzatuko den kanpainak helburu argia du: mendeetan zehar narrasti hauen jazarpena eragin duten ideia faltsuak errotik kentzea. Aranzadiko arduradunen arabera, sugeak “oinarri zientifikorik gabeko gizarte- eta kultura-tratu txarren biktima izan dira”, “XXI. mendean onartezina” iruditzen zaien egoera.
Sare sozialetan partekatutako argazkiak
#sugebizi-n parte hartzea erraza da. Ekimenean parte hartu nahi duten horiek suge bat aurkitzen dutenean, distantzia zuhur batetik argazkia atera, koordenatu geografikoak apuntatu eta datu horiek Bluesky edo Mastodon sare sozialen bidez partekatu behar dituzte #sugebizi traola erabiliz eta Aranzadiren kontu ofizialak aipatuz (@aranzadi.bsky.social / @aranzadi mastodon.eus).
Trukean, adituen taldeak konpromisoa hartzen du jasotako argazki bakoitzaren espeziea identifikatzeko. Identifikazioa errazteko, gomendatzen da animalaren burua irudian ikusgai egotea. Kanpainak hildako sugeen argazkiak ere onartzen ditu.
Aurtengo kanpainaren berritasunetako bat da tailerrak antolatuko direla eskolentzat, hitzaldiak Euskal Herriko herrietan eta mendi-irteera gidatuak narrasti hauek euren habitat naturalean hobeto ezagutu nahi dituztenentzat. Horrez gain, interesdunek Ander Izagirrek diseinatutako poster hezitzaile bat eskuratu dezakete tokiko aleen argazki profesionalekin, Aranzadiren webgunean eskuragarri dagoena.
Antolatzaileek parte-hartzean oinarrizko arau batzuk jarraitzeko garrantzia azpimarratzen dute:
- sugeak ez ukitu edo gogaitu ere
- beti mantendu segurtasun distantzia
- sugeen bizitza errespetatu. Ez ezazu sugerik hil!
Argazkia: aranzadi.eus
Advertisements
