Haurdun geratu nahi ez duten arren, eta antisorgailurik gabeko sexua arriskutsua dela jakin arren, Estatuko emakumeen erdiek baino gehiagok (% 52,7) sexu-harremanak izan dituzte antisorgailurik erabili gabe. Hori da, hain zuzen ere, HRA Pharmak 40dB enpresa demoskopikoarekin lankidetzan egindako ‘Emakumeen Osasun Sexualari buruzko Inkesta’ren datu nagusietako bat. Inkesta horrek 16 eta 35 urte bitarteko Espainia osoko 2.235 emakumeri egin die galdeketa.
Azterlanak erakusten duenez, emakumeen artean babesik gabeko sexu-harremanen indize kezkagarriak eta sexu-osasunari buruzko desinformazio-maila oso altuak daude. Horrek, aldi berean, agerian uzten du ondorio negatiboak eragiten dituen informazio falta larria dagoela. Aipatu txostenak ematen dituen ondorioek, nolabait, azaltzen dute, hein handi batean, Estatuan ematen diren haurdunaldien borondatezko etenduren eta nahi ez diren haurdunaldien datu altuak.
Sexu-heziketa
Makroinkestaren arabera, galdetutako emakumeen erdiak (% 50,1) lagunengana edo Internetera jotzen du sexuari buruzko zalantzak argitzeko, eta % 11,5 bakarrik joaten da osasun-profesionalengana. Beste emaitza deigarri bat inolako sexu-informaziorik jaso ez dutela dioten emakume gazteena da (% 31,8).
Emakumeen erdiak (% 50,1) lagunengana edo Internetera jotzen du sexuari buruzko zalantzak argitzeko, eta % 11,5 bakarrik joaten da osasun-profesionalengana.
Gainera, 10 emakumetik 4k bakarrik (% 43,1) dio informazioa jaso duela lehen sexu-harremana izan aurretik. Eta sexu-heziketa jaso dutela diotenen artean, hiru laurdenek uste dute informazio hori zientifiko/biologiko hutsa izan dela, eta ez diola lagundu erabaki informatuak hartzen (% 46,6). Bestalde, 10 emakumetik ia 4k (% 38,4) uste du eskolan jasotako sexu-hezkuntza alferrikakoa dela edo ez dagoela eguneratuta, eta % 34,9k dio hilerokoaren eta menstruazio-zikloaren inguruan ezer gutxi ikasi duela.
Antisorgailuen erabilerari dagokionez, 16 eta 35 urte bitarteko espainiar emakumeen ia erdiak (% 47,3) ez du inolako hormona-antisorgailurik erabiltzen. Ehuneko hori % 58,5eraino igotzen da 16 eta 19 urte bitarteko emakume gazteen artean.
Bestalde, estatuko emakumeen erdiak (% 51,8) ez du inoiz urgentziazko antisorgailuren bat erabili (adibidez, ‘biharamuneko pilula’ izenarekin ezagutzen den hori). Kasu horretan ere, kopuru hori nabarmen hazten da emakume gazteenen artean (% 71,7).
