Gasteizko Udalak antolatzen duen HIGA-Hizkuntza Gutxituetako Hiztun Gazteen Nazioarteko Topaketaren bosgarren edizioa 2025eko uztailaren 14tik 18ra ospatuko da. Bertan parte hartu nahi duten gazteek urtarrilaren 10era arte izango dute izena emateko aukera higatopaketa.eus webgunean. Ekitaldia hiru hizkuntzatan izango da: ingelesa, euskara eta gaztelania.
Bost egunetan zehar garatuko den programaren helburu nagusia da hizkuntza gutxituen biziberritzea sustatzea eta munduko hizkuntza komunitate ezberdinen arteko lankidetza sareak eratzea. Parte-hartzaileek hizkuntza aktibismoan prestakuntza jaso, esperientziak partekatu eta errealitate kultural ezberdinak ezagutu ahal izango dituzte prestakuntza jardueren, mikrofono irekien, kontzertuen, dantzen eta bisita gidatuen bidez.
HIGA topaketa
HIGA-Hizkuntza Gutxituetako Hiztun Gazteen Nazioarteko Topaketaren lehen edizioa 2011an izan zen. Ordutik hona, hazkunde nabarmena izan du. 2023ko edizioan parte-hartzaileen aniztasun handiena lortu zuen, 55 hizkuntza gutxitu ordezkatzen zuten 75 parte-hartzailerekin.
2025erako, topaketak bere irismena zabaltzen du aktibistak, akademikoak eta ikertzaileak barne hartuz, eta arlo berriak aztertuko ditu, hala nola artearen eta hizkuntza aktibismoaren arteko harremana.
Prestakuntza ofizialki aitortuko da Euskal Herriko Unibertsitateak (UPV/EHU) emandako udako ikastaroko ziurtagiri baten bidez.
Argazkia: Higa Topaketa
Advertisements
