Irakurketa denbora: Minutu 1
Bilbok “Bilbao Distrito Jazz” egitasmoaren edizio berri bat hartuko du urtarrilaren 31etik martxoaren 7ra bitartean. Udalak Bilbaina Jazz Club-arekin elkarlanean antolatzen duen ekimen honek jazz musika eramango du hiribilduko hainbat auzotara. Izan ere, programazioa osatzen duten kontzertu guztiak sei egoitzatan zehar banatuko dira: J.C. Arriaga Kontserbatorioa, Bidebarrieta Liburutegia, Bertendona institutua eta Begoña, Errekalde eta Otxarkoagako Udal Zentroak.
Sarrerak www.bilbaokultura.eus webgunean daude eskuragarri 5 euroko prezioan. Edukieraren % 20 emanaldi bakoitza hasi baino ordu bete lehenago zuzeneko salmentarako gordeko da.
Bilbao Distrito Jazz
Programazioa bertako talentuarekin hasiko da J.C. Arriaga Kontserbatorioan, non Nerea Arrieta Triok jazzeko gai ezagunen moldaketak konposizio originalekin uztartzen dituen errepertorioa aurkeztuko duen. Hagako Royal Conservatory-n formakuntza jaso duen Nerea Arrieta Fran Serrano kontrabaxuarekin eta Rakel Arbeloa bateriarekin batera arituko da.
Begoñako Udal Zentroak David Sanchoren jazz garaikidea rock sinfoniko-progresiboaren eraginekin uztartzen duen “Mind in Progress” lana hartuko du otsailaren 7an.
Aste bat geroago, otsailaren 14an, Errekaldeko Udal Zentroak Xavier Casellas hartuko du “Vocalese Voyage”-rekin, jazzaren tradizioa ikuspegi moderno batetik berrinterpretatzen duen proiektua.
Bidebarrieta Liburutegia “Denbora”-ren estreinaldiaren agertokia izango da otsailaren 21ean, Mikel Urretagoiena bateria-jotzailearen lehenengo bakarkako lana, Xan Campos pianoan eta Dani Pozo baxu elektrikoan lagun izango dituena.
Otsailaren 28an, Otxarkoagako Udal Zentroak Adele Sauros saxofoi-jotzaile finlandiarra hartuko du, egungo Europako jazzaren figura nabarmenetako bat eta 2021eko Jazz Album Onenaren Emma Sariaren irabazlea.
Zikloa martxoaren 7an itxiko da Bertendona Institutuan Mikkel Ploug gitarrista danimarraren emanaldiarekin, “Faroe” albumagatik Grammy sarietarako izendatua eta nazioartean ezaguna “Alleviation” lanagatik, Spotifyn bi milioi erreprodukzio baino gehiago dituena.
